Ерөнхий сайд аа, авлига, албан тушаалын хэрэгт холбогдсон ОНӨААТҮГ-ын дарга Ч. Мэндбаяр​ нарт хэзээ хариуцлага тооцох вэ?

Ерөнхий сайд Л.Оюун-Эрдэнэ яг сарын өмнө "Авлига, албан тушаалын хэргээр шүүхээс ял авсан хүнийг төрд дахин ажиллуулахгүй. Авлигатай хийх бидний тэмцэл зөвхөн авлига, албан тушаалын гэмт хэрэгтнүүдээр хязгаарлагдахгүй, харин түүнийг ургуулж буй хөрс суурь, нөхцөлдүүлэгч хүчин зүйлсийг устгахад чиглэнэ" хэмээн мэдэгдсэн. 

Гэтэл төрийн бага дунд шатанд албан тушаалын хэргүүд шил шилээ даран гарч дарга нар хөлжсөөр байна. Нэгэн жишээг дурьдахад “Орон сууц нийтийн аж ахуйн удирдах газар” ОНӨААТҮГ-ын дарга Ч. Мэндбаяр тахал далимдуулж их хэмжээний мөнгийг халаасандаа хийсэн нь баримтаар ил болоод байна. 

Тодруулбал, коронавируст халдварын нөхцөл байдлаас үүдэн 2020 оны арванхоёрдугаар сарын 1-ээс зарим ААН-үүд, айл өрхүүдийн өрхүүдийн ус, цахилгаан, хогны мөнгийг тэглэсэн. Үүнд шаардлагатай мөнгийг  Эрдэнэт үйлдвэр санхүүжүүлсэн юм. Гэтэл Ч.Мэндбаяр нь “Орон сууц нийтийн аж ахуйн удирдах газар” ОНӨААТҮГ-ынхан айл өрх, аж ахуйн нэгжүүдийн цэвэр бохир усны нэхэмжлэл дээр илүү бичилт хийж, төрөөс их хэмжээний мөнгө завшсан хэргээр АТГ-т шалгагдаж эхэлсэн байна. Үүнд ОСНААУГ-ын дарга Ч.Мэндбаяраас гадна УСУГ-ын дарга Ц.Төрхүү, Хот, суурины ус хангамж, ариутгах татуургын ашиглалт, үйлчилгээг зохицуулах зөвлөлийн дарга Ж.Батсуурь нарын нэр яригдаж байгаа юм. Эдгээр хүмүүс бол айл, өрх, аж ахуйн нэгжийн цэвэр, бохир усны төлбөр дээр төлбөр нэмж бичиж, улсад их хэмжээний хохирол учруулсан байгаа юм.

Ийнхүү дарга нь нэр бүхий албан тушаалтнуудтайгаа нийлэн эрх мэдэл, албан тушаалын байдлаа урвуулан ашиглаж, айл өрх, ААН байгууллагын усны төлбөл зохих дүнд илүү бичилт хийж төрөөс ХОЁР тэрбум гаруй төгрөгийг завшсан гэх асуудал өндрөө авч эхэллээ. 

Гэвч эдгээр хүмүүс Ерөнхий сайд таны бодлого шийдвэрийг үл тоон албан тушаал эрх мэдэлтэйгээ зууралдсаар байгаа нь анхаарал татаж байна.