Талийгаач Н.Байгалмаагийн ээж: Гадны хүн шөнө байтугай өдөр ч байгаагүйг ичихгүй бол хоёр ачаасаа асуугаарай

Тэмээгээр аялагч Н.Байгалмаа өнгөрсөн тавдугаар сард хамарсалтайгаар нас барсан. ОБЕГ-аас хоногийн мэдээлэлд  Налайх дүүргийн тавдугаар хороонд иргэн Б гэртэйгээ шатаж нас барсан тухай мэдээлэл өгч байв. Цагдаагийн байгууллагаас ч энэ мэдээллийг өгч буй. Гэвч  талийгаачийн хадам ээж Э.Цэрэндолгор “Талийгаач Б нь Э гэх эрэгтэй хүнтэй хамт шатаж, амиа алдсан” гэх утгатай мэдээллийг нийгмийн сүлжээнд цацсан. Үүнийг ЦЕГ-ийн Хэвлэл мэдээллийн төвийн дарга, хурандаа Б.Баатархүү үгүйсгэсэн. Гэвч Э.Цэрэндолгор удаа дараа энэ нийгмийн сүлжээнд дээрх асуудалтай холбогдуулан лайв хийсээр байгаа юм. 

Үүний хариуд талийгаачийн ээж Ж.Норжмаа цахим хуудастаа "Сайхан тавиланг хэцүү болгож, сайхан гэр бүлийг хэрүүлээр самраад дуусгалаа. Цэрээн чиний том хүү, хоёр ач охин миний хажууд байна. Эднийг хайрлахгүй юм аа гэж бодоход тайван орхиод өгөөч. Гэнэтийн лай хэлж ирдэггүй шүү дээ. Бид бүгд гэрээ зөөж бусдын адилаар охин гэрийн дотор хөшиг, цаваг угааж, хөгшин хоёр зээтэй ус зөөж, би уураг чанаж, заваараа худаг ажиллуулж хүн бүр л дор бүрнээ ажиллаж байсан өдөр юм. Хэрэг гарахад хоёр зээ минь гадаа бүгдийг харж “Ээж ээ” гэж орилж байсан. Харин би гэрийн бүслүүр хэрчиж, хүүгийн хамт галаас охиноо чирч гараад хажууд нь дөрвөн цаг орилж суусан. Цөхрөхдөө би өөрийгөө охины цогцостой хамт бичлэг хийж авсан.Гадны хүн шөнө байтугай өдөр ч байгаагүйг  ичихгүй бол хоёр  ачаасаа асуугаарай.  Чамд  хэлээд өгөх байх аа. Юуны чинь Э, Б гэх хүний цогцос бэ. Юун нотолгоо, нотолгоо чинь бид. Чамаас болж хоёр охины зүрх шаналж байна. Эмээгээ байг гэхэд энгийн хүн ч ийм зүйл бичихгүй дээ. Араатан амьтнаас доор сэтгэлтэй монгол эмээ байгаад их харамсаж байна. Охиныг минь амьдад ч,  үхсэн ч гүжирдэж, тамлаж байна” хэмээн бичжээ.