СЭРЭМЖЛҮҮЛЭГ: Таван хүн усанд осолдож нас барлаа

Амралт зугаалгын улирал үргэлжилж байгаатай холбогдуулан усны ослууд өдөр бүр гарсаар байна. 

Өнөөдөр Онцгой байдлын мэдээгээр усны ослоор ТАВАН хүн нас  баржээ. 

Булган аймгийн Хутаг-Өндөр сумын Хонгор багийн “Хорин нэгийн-Арал” гэдэг газар Эгийн голын эрэг дээр 5 хүн зугаалж байснаас 1 хүн живж нас баржээ.  Орхон аймгийн Баян-Өндөр сумын харьяат иргэн 28 настай эрэгтэй П нь согтууруулах ундааны зүйл хэрэглэсэн усанд живжээ. Цогцсыг  Эгийн голын бургасан дотор усны мандал дээр хөвж байсныг олж, тус сумын Цагдаагийн хэсгийн төлөөлөгчид шилжүүлж өгчээ.

Говьсүмбэр аймгийн Сүмбэр сумын 6 дугаар багийн “Зараа булан” гэдэг газар 14 хүн “Хэрлэн” голын эрэгт зугаалж явснаас Говьсүмбэр аймгийн Баянтал сумын харьяат иргэн Б голын усанд сэлэхээр ороод живж нас баржээ. Цогцсыг “Зараагийн хошуу” гэдэг газар усны мандалд хөвж байсныг олж, Хэнтий аймгийн Бор-Өндөр сумын Цагдаагийн хэсгийн байцаагчид шилжүүлж өгсөн байна. 

Сэлэнгэ аймгийн Сайхан сумын Номгон багийн “Шимт нарс” гэдэг газар  компанийн 13 ажилтан “Хараа” голын эрэгт зугаалж байснаас 1 хүн нь загас барьж байгаад 21 настай  М живж нас баржээ. Цогцсыг  сумын Цагдаагийн хэлтсийн эрүүгийн төлөөлөгчид шилжүүлэн өгсөн.

Баяхонгор аймгийн Баянцагаан сумын Гичгэнэ багийн “Цагдуултайн-Ам” гэдэг газарт  хиймэл нууранд 2 иргэн сэлэхээр ороод живж нас баржээ. Хоёр цогцсыг тус сумын Цагдаагийн хэсгийн төлөөлөгчид шилжүүлж өгчээ.