Г.Занданшатар: АН-ын Улаанбаатар, МАН-ын Улаанбаатар гэж байхгүй шүү?

УИХ-ын чуулганы өнөөдрийн хуралдаанаар Улаанбаатар хотын хөгжлийн бодлогын Түр хороо байгуулах тухай УИХ-ын тогтоолын төслийн хэлэлцэх эсэхийг хэлэлцлээ.

Хэлэлцүүлгийн үеэр УИХ-ын гишүүн Д.Ганбат "Аз жаргалтай Улаанбаатар байгуулна гэсэн хаана байна вэ? Улаанбаатар хотын иргэд хэцүү амьдарч байна. Улаанбаатар хотод гайгүй ажилласан хэдхэн дарга бий. Танай намаас М.Энхболд даргыг гайгүй ажилласан гэж бодож байна. Манай намын Э.Бат-Үүл, Наранцацрал даргын үед хот гайгүй болох гэж байсан. Одоо та нар бол элгийг нь авч байна. Ойр зуурын юмаар хуурдаг.  Зайсан, гэр хороолол хоёр талын гамшгийн туйл болчихоод байна" гэлээ. 

Үүнд байнгын хороны дарга Ж.Сүхбаатар "Тогтоолын төсөл санаачлагчид өөдрөг байна. Бэрхшээлд дунд боломж байгааг олж харж байна. Төлөвлөлтөө шийдэхгүй бол 2024 онд та гараад ч барьж дийлэхгүй ээ. Та гарч ирээд бүр дийлэхгүй. МАН, АН гээд байх юм байхгүй. Улаанбаатарын асуудлыг 10 жил үзэж тарж байж шийднэ" гэлээ. 

Мөн УИХ-ын дарга Г.Занданшатар "Улаанбаатарт нэг л өдөр энэ зовлон бэрхшээл түгжрэл бий болчихоогүй. АН-ын Улаанбаатар, МАН-ын Улаанбаатар гэж байхгүй. Монголын Улаанбаатар л гэж байгаа. Энэ хотоо аз жаргалтай болгохын тулд энэ санаачлага гарч байгаа гэж ойлгож байна" гэлээ.