Усанд осолдсон таван настай хүүг эрэн хайх ажиллагаа үргэлжилж байна

Энэ сарын 17-нд Баянзүрх дүүргийн 20 дугаар хорооны “Хоохойн-Ам” гэдэг газар  “Туул” голын эрэг дээр гэр бүлийн 3 хүн амарч байх үед бага насны хүүхэд усанд осолдсон.

Дуудлага мэдээллийн  17:47 цагт хүлээн авсан бөгөөд Налайх дүүргийн Онцгой байдлын хэлтсийн Гал түймэр унтраах, аврах 28 дугаар анги, Аврах анги-105-ын алба хаагчид 05.18-ны өдрийн 06:40 цагаас эхлэн Налайх дүүргийн 1 дүгээр хорооны харьяат иргэн 5 настай эрэгтэй М -г анх осолдсон Хоохойн-Ам гэдэг газараас Яармаг-ын гүүр хүртэл 85 км-т завиар мөн Минж үржүүлэгээс Маршилын гүүр хүртэл 15 км-т явганаар, усанд 45 удаа шумбалт хийж эрэн хайх ажиллагааг зохион байгуулсан боловч үр дүнд хүрээгүй байна. 

Иймээс өчигдөр оройн  20:30 цагт эрлийг түр зогсоогоод өнөөдөр өглөөний 06:00 цагаас эрлийн ажиллагааг үргэлжлүүлж байна.

Эх сурвалжуудын мэдээлж байгаагаар хүүг усанд осолдох үед ээж нь согтуурсан биеэ хянах чадваргүй байсан аж. 5 настай М 4 болон 6 настай хүүхэдтэй хамт голын эрэг дээр тоглож байгаад харамсалтайгаар усанд осолдсон байна.  Осол болох үед голын эрэг дээр амарч байсан өөр хүмүүс ослын дуудлагыг Онцгой байдлын газарт өгсөн байна.