МАН "том санхүүжүүлэгч" Ц.Анандбазарыгаа хөөх үү?

Сүүлийн сар шахамын хугацаанд УИХ-ын гишүүн Ц.Анандбазартай холбоотой цочирдом мэдээллүүд нийгмийн сүлжээнд тархаж байна.

 Яг энэ асуудалтай холбогдуулан долоо хоногийн эхэнд Ерөнхий сайд Л.Оюун-Эрдэнэ "Ц.Анандбазар гишүүнтэй холбоотой асуудал нийгэмд нэлээд газар авч байна. Мэдээж парламентын гишүүний өөрийн бүрэн эрхийн асуудал байдаг. Гарч ирсэн бүх асуудлыг төлөө парламентын гишүүн огцорно гэдэг амаргүй асуудал мөн үү гэвэл мөн. Гэхдээ миний хувьд Ц.Анандбазар үнэхээр гэм буруугүй бол УИХ-ын гишүүнээсээ түдгэлзээд шалгуулах хэрэгтэй. Гэм буруугүйгээ нотлочихоод ороод ирвэл ёс зүйн хувьд хамгийн зөв гэж бодож байна. Хариуцлага тооцох субъектэд нь Ерөнхий сайдын хувьд саналаа хэлсэн" гэсэн байр суурь илэрхнийлсэн. 

Тэгвэл өчигдөр МАН-ын дарга У.Хүрэлсүх “Нөхөр Ц.Анандбазарыг Цагдаагийн байгууллага шалгаж байгаа юм билээ. Тэр үүсээд байгаа асуудлаар нь. Хэрвээ гэм буруутай нь тогтоодвол энэ хүн хариуцлагаа үүрэх ёстой. Буруугүй бол буцаад ороод ирэх ёстой. Тийм учраас энэ хүн УИХ-ын гишүүнээсээ түдгэлзэж байгаад шалгуулах ёстой талаар намын даргын хувьд зарчмын байр сууриа илэрхийлсэн.Үгүй юм бол намаас нь түдгэлзүүл гэдэг асуудлыг ярьж байгаа. Хэрэв гэм буруугүй бол намдаа эргүүлж авна. Гэм буруутай бол намын тухай асуудлыг ярина” гэсэн байр суурийг илэрхийлж эхэллээ. 

Тэгвэл яг энэ асуудалтай холбогдуулан  #Metoo зохион байгуулагчдын төлөөлөл, түүний зохион байгуулагч М.Нарантуяа МАН-ын Төв байрны гадна очиж тус намын дарга У.Хүрэлсүхэд шаардлага хүргүүлсэн. Тэрбээр “Намын даргад нь хандахаас өөр арга байсангүй. Хэрэв энэ хүндээ ёс зүйн хариуцлага хүлээлгэж чадахгүй юм бол яах аргагүй  Ц.Анандбазар нь МАН-ын  томоохон санхүүжүүлэгч гэж үзнэ. Энэ хүндээ хариуцлага тооцож чадахгүй юм бол ашиг сонирхлын зөрчил, холбоо байгаа учир дараа дараагийн арга хэмжээг авах болно" хэмээн мэдэгдсэн. 

Ийнхүү Ерөнхий сайд хийгээд МАН-ын дарга У.Хүргэлсүх нар өөрсдийн байр сууриа илэрхийллээ. Тэгэхээр ирэх өдрүүдэд МАН Ц.Анандбазарын ёс зүйн асуудлыг хөндөж, хөөх эсэх асуудлаар шийдвэр гаргах уу гэх асуулт урган гараад байна.