“Мөнхийн реп”-ийн Б.Лхагвацэрэнгийн эхнэрээ зодсон гэх хэрэг прокурорт шилжжээ

“Дөрөвдүгээр сарын 19-нд Лхагвацэрэнд ингэтлээ зодуулсан юм аа. Үр хүүхдийг нь төрүүлээд 9 сартай хөхүүл юм аа би. Гэр бүлийн хүчирхийллийн төв нь надтай холбогдоно уу. Яагаад гэхээр энэ хүн намайг ингэтэл зодчихоод өмгөөлөгч найзаа аваад надтай тэмцэж байгаа юм аа. Би хаана хандах ёстой вэ? ” хэмээн  “Мөнхийн реп” хамтлагийн дуучин Б.Лхагвацэрэнгийн эхнэр нийгмийн сүлжээндээ мэдээлсэн. 

Тэгвэл Б.Лхагвацэрэн өнгөрөгч дөрөвдүгээр сарын 30-нд Эрүүгийн хуулийн 11.6-2 дахь хэсэг болох “Гэр бүлийн хүчирхийлэл үйлдэн, хүний эрүүл мэндэд хөнгөн хохирол санаатай учруулах” заалтад яллагдагчаар татагдаж, шалгалтын мөрдөн шалгах ажиллагаа дууссанаар хэргийг Баянгол дүүргийн прокурорт шилжүүлжээ.

Үйл явдалтай холбогдуулан  “Мөнхийн реп” хамтлагийн дуучин Б.Лхагвацэрэн "Өөдөсхөн чинээ хоёр хүүг минь янхнааc төрсөн золбин хүүхдүүд гэж хэлснийх нь хариуг аав хүн би сэтгэл дотроо уйлж өмөлзөхдөө тэсэлгүй өгсөн. Ярьвал их юм байгаа. Шүүхийн өмнө бүгдийг ярина аа. Ил харагдаж байгаа шигээ байдаггүй юм аа. Эмэгтэй хүний хүчирхийлэл гэж байдаг шүү. Харамсалтай нь дандаа хаалганы цаана болж байдаг” хэмээн бичжээ.