Ц.Нямдорж: Та нар намайг худлаа ярьж байхыг сонссон уу?

Засгийн газрын хэрэг эрхлэх газрын дарга Ц.Нямдорж сэтгүүлчдийн зарим асуултад хариулт өглөө. Энэ үеэр С.Зориг агсны амь насыг хөнөөсөн хэргийн материалыг бүхэлд нь нууцаас гаргахаар шийдвэрлэсэнтэй холбогдуулан хэн нь үнэн, хэн нь худал ярьж байгаа тухай эргэлзээ тайлагдах уу? гэсэн сэтгүүлчийн асуултад Ц.Нямдорж "Та нар намайг худлаа ярьж байхыг сонссон уу" гэсэн хариулт өгсөн юм. 

Мөн тэрбээр "Хоёр хоногийн өмнө Т.Чимгээгийн ах Хүрэлбат нэг үг хэллээ дээ. Энэ хэргийн захиалагч Бат-Үүлийг татаад, Булган гэдэг хүний 10 сар хорьсон, Ганхуяг гэдэг хүний 8 сар хорьсон. 2016 оны орон нутгийн сонгуулийн өмнө Э.Бат-Үүлийг яллагдагчаар татаж байна. Э.Бат-Үүл намайг хүн амины хэргээр татчихлаа гэж байсан. 1986 оны Эрүүгийн хуулийн Улс төрийн зүтгэлтний амь насанд халдах зүйл ангиар татсан" гэсэн юм. 

 Т.Чимгээгийн ах Хүрэлбат: Чимгээ надад "Ганхуяг, Булган гэдэг хоёр хүний Ганхуяг нь хамтрагч, Булган нь хамжигч Тагнуулын мөрдөн байцаах албаныхан баривчилсан байдаг. Тухайн үед Т.Чимгээ, Б.Содномдаржаа хоёрыг бас барьсан байсан. 2016 оны есдүгээр сарын 2-нд ТЕГ-ын Мөрдөн байцаагч Бархасбадь гэдэг хүн Ганхуяг, Булган, Чимгээ, Содномдаржаа, Отгонбаатар, Амгаланбаатар, Бат-Үүл нарнь С.Зоригийн амь насыг зохион байгуулалттай хөнөөсөн нь хавтаст хэрэгт авагдсан  нотлох баримтаар нотлогдож байна гэж мэдэгдсэн байдаг. Тийм учраас 1986 оны Эрүүгийн байцаан шийтгэх хуулиар санаатайгаар улстөрийн аллага үйлдэх зүйлчлэлээр яллагдагчаар татсан байдаг. Тухайн үед Булганыг 10 сар хориод сулласан. Ингээд Булганыг ялтан ч биш хохирогч ч биш болгоод гаргачихсан.  Ганхуягийг найман хориод сулласан.  Мөн тухайн үед нийслэлийн хяналтын прокурор Батжаргал одоо ч ажиллаж байгаа. Э.Бат-Үүл нь энэ хэргийн зохион байгуулсан гэх нотлох баримт байхгүй байна гээд яллагдагчаар татагдсан тогтоолыг хүчингүй болгосон. Хамжигч, хамтрагч, захиалагчийг нь нотлогдохгүй байна гэж явуулчихаад Т.Чимгээ, Б.Содномдаржаа нарыг онц хэрцгийгээр хүн амины хэрэг үйлдсэн гээд яллачихсан шүү дээ.