М.Энхболдын зөвлөх, Ерөнхийлөгчийн төлөөлөгч боллоо

Хуульч Б.Гүнбилэг Ерөнхийлөгчийн итгэмжлэгдсэн төлөөлөгчөөр  ажиллахаар болсон гэдгийг өнөөдөр олон нийтэд зарлалаа. 

Ерөнхийлөгч өнөөдөр хууль зүйн салбарын эрдэмтэн, судлаач, хуульчдын төлөөллийг хүлээн авч уулзаж, өөрийгөө дахин нэр дэвших боломжтой эсэх асуудлаар санал солилцов. 

Энэ үеэр хуульч Б.Гүнбилэг "Монгол Улсын Үндсэн хуульд орсон нэмэлт, өөрчлөлт, түүнийг дагаж мөрдөх журмын тухай хууль болон Ерөнхийлөгчийн сонгуулийн хуульд  бүрэн эрхээ хэрэгжүүлж байгаа Ерөнхийлөгчийн нэр дэвших эрхийг хязгаарласан зүйл огт байхгүй, хууль зүйн шинжлэх ухааны онол, практикын үүднээс ч эргэлзээ дагуулах, маргах асуудал огт байхгүй. Таныг зөвшөөрвөл би энэ асуудлаар Монгол Улсын Ерөнхийлөгчийн итгэмжлэгдсэн төлөөлөгчөөр ажиллаж, хууль зүйн салбарын эрдэмтний хувьд Үндсэн хуулийнхаа үзэл санаа, суурь зарчим,  үнэт зүйлийг хамгаалж ажиллах хүсэлтэй байна” гэлээ.

Түүний хувьд өмнө нь М.Энхболдыг УИХ-ын дарга байхад зөвлөхөөр нь ажиллаж байсан. Харин өнгөрсөн 2020 оны сонгуульд МАН-аас нэр дэвших тойрог өгөөгүй учраас тэрбээр Булган аймагт бие даан нэр дэвшсэн ч, амжилт олоогзй юм. Тэгвэл одоо өөрийн хүсэлтээр  Ерөнхийлөгчийн Цэцэд хандсан асуудлыг төлөөлж, ажиллахаар боллоо.