ӨМӨЗО-нд "Монгол хэлтэйгээ салах ёс хийж байхад" Монголын төр таг чиг

Энэ сарын эхээс нийгмийн сүлжээнд тархсан Өвөрмонгол сурагчдын зураг. Энэ зураг "Монгол хэл дээрх сүүлчийн хичээлдээ орох гэж байгаа Үндэсний хувцастай хадаг барьсан сурагчид" гэсэн нэртэй. Тэд урт хугацааны туршид Хятад хэл дээр хичээл үзэхийг эсэргүүцсэн ч амжилт ололгүй, эцэс нь ийн Монгол хэлтэйгээ, эх хэлний багш нартайгаа салах ёс гүйцэтгэж байна.

Сануулахад, Өвөрмонголын өөртөө засах орны сургуулиуд нэгдүгээр ангид анхлан үздэг хэл бичгийн хичээлээр хятад хэлийг судлах болсон. Тус шийдвэрийг БНХАУ-ын Засгийн газраас гарахад Өвөрмонголд төдийгүй дэлхийн өнцөг булан бүрт "Монгол хэл үгүй болох цаашлаад Монгол үндэстнийг Хятадад уусгах бодлого явагдаж байна" хэмээн шийдвэрийг эсэргүүцсэн. Үүнээс үүдэн 10 гаруй мянган хүн баривчлагдаж, тэмцэл үр дүнд хүрэлгүй, дууссан юм. 

Иймээс тэд энэ сарын эхэнд ийн Монгол хэлний хичээлтэйгээ салах ёс хийсэн хэрэг. Энэ талаар эх сурвалж "ӨМӨЗО-нд Монгол хэлээр хичээл орохыг хориглосон. Иймээс эх хэлний багш нар ажлаасаа халагдахаасаа өмнө сүүлийн удаа шавь нартайгаа уулзаж, салах ёс хийх хүсэлтийг Хятадууд хүлээн зөвшөөрсөн тул хүүхдүүд үндэсний хувцасаа өмсөн, хадаг барин багш нартай золгоод нүдэндээ нулимстай салсан юм билээ" гэсэн тайлбар бичжээ. 

Ийнхүү ӨМӨЗО-нд эх хэлний асуудал хурцаар тавигдаж, хичээлийн программаас хасагдаж байхад Монгол төр таг чиг. 

Чухам яагаад ингэж таг чиг байгааг хардах шалтгаан ч бий. Өвөрмонголчууд Эх хэлээ авч авч үлдэхээр эсэргүүцэл илэрхийлж байх үед БНХАУ-ын Гадаад хэргийн сайд Ван И  Монгол Улсад 700 сая юанийн буцалтгүй тусламж олгосон. Нэг үгээр тэд энэ мөнгийг өгөөд "Өвөрмонгол хүүхдүүдийн хичээлийг эх хэлийг хасахыг бүү эсэргүүц" гэсний дохио байж магадгүй.