Залуусын фитнесст явах 2 сарын төлбөрийг төрөөс даана гэв

Сар шинийн баярын өмнө Засгийн газраас  “Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө”-г баталсан. 

Энэхүү төлөвлөгөөний хүрээнд  10 их наяд төгрөгөөс “Залуучуудыг ажил, мэргэжилд бэлтгэх, эрүүл чийрэг, идэвхтэй амьдралын хэв маягт хөтлөх хоёр сарын хугацаатай, сарын 500 мянган төгрөгийн тэтгэлэгт сургалтад хамруулахад зориулж 500 тэрбум төгрөг”-ийг баталсан.

Энэ дагуу уг хөтөлбөрийг хэрэгжүүлэхэд МҮОХ тусгайлан үүрэгтэйгээр буюу хөрөнгө хувиарлалтын асуудлыг шийдвэрлэж магадгүй юм. 

Учир нь, МҮОХ-ны Ерөнхийлөгч Н.Түвшинбаяр, Ерөнхий нарийн бичгийн дарга Э.Бадар-Ууган нар “Идэвхтэй хөдөлгөөн-Спортын шилжилт”-ийн төлөвлөгөөгөө өнгөрөгч долоо хоногт Ерөнхий сайд Л.Оюун-Эрдэнэд танилцуулжээ. Энэ үеэр Л.Оюун-Эрдэнэ Засгийн газар эртэч, эрүүл, идэвхтэй, жингийн илүүдэлгүй монгол болохыг иргэддээ уриалж байгаа энэ үед хамтран ажиллах болсонд талархал илэрхийлж, боломжит бүх хэлбэрээр дэмжлэг, туслалцаа үзүүлэхээ илэрхийлсэн” гэх албаны мэдээлэл бий.