Гурван багшийн холбогдсон хүчингийн хэрэгт "Хавтас хэрэг нээгдээгүй" байсан уу?

Өнгөрсөн сарын 27-нд Сэлэнгэ аймгийн Мандал суманд ЕБС-ийн сургуулийн гурван багш хоёр сурагч охиныг зочид буудалд хүчиндсэн хэрэг гарсан талаарх мэдээллийг хүргэж байсан. 

Тодруулбал, Сэлэнгэ аймгийн Мандал сумын ерөнхий боловсролын хоёр сургуулийн гурван багш Зүүнхараад байрлах "Нарны өртөө" зочид буудалд архидан согтуурч, 15 настай хоёр эмэгтэй сурагчтай хууль бус харьцаанд орсон байж болзошгүй хэргийг цагдаагийн байгууллага шалгаж байна.

Эх сурвалжуудын мэдээлж байгаагаар багш, сурагч нь удаан хугацааны турш сургуулиас гадуур харилцаатай байсан байх магадлалтай гэнэ. Гэхдээ сурагч охид дарамтад орж бэлгийн харьцаанд орсон эсэхийг хуулийн байгууллага шалгаж тогтооно. 

Энэ хэрэгт салбар яам нь ихээхэн анхаарал хандуулж буй. Уг хэрэг гарснаас долоо хоногийн дараа БШУЯ-ны холбогдох хүмүүс хэргийг шалгаж байгаа цагдаагийн байгууллагаас тодруулга авахаар холбогдоход "Тухайн асуудал дээр хавтаст хэрэг нээгдээгүй" байсан болзошгүйг эх сурвалжууд хэлж байна. 

Ямартай ч салбар яамнаас дээрх асуудалтай холбогдуулан Сэлэнгийн аймгийн Засаг даргад шаардлага хүргүүлээд байгаа аж. 

Ямартай ч багш нарын үйлдэл нь тогтоогдсон тул прокурорын зөвшөөрлөөр цагдан хорьсон байна. 

12.1 дүгээр зүйл.Хүчиндэх

1.Хохирогчийн хүсэл зоригийн эсрэг хүч хэрэглэж, хүч хэрэглэхээр заналхийлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй, эсхүл эд хөрөнгө, албан тушаал, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орсон, эсхүл бэлгийн харьцааны шинжтэй хүч хэрэглэсэн үйлдэл хийсэн бол нэг жилээс таван жил хүртэл хугацаагаар хорих ял шийтгэнэ.

12.2 дугаар зүйл.Бэлгийн дур хүслээ ёс бусаар хангах

1.Хохирогчийн хүсэл зоригийнх нь эсрэг хүч хэрэглэж, эсхүл хүч хэрэглэхээр заналхийлж, эсхүл биеэ хамгаалж чадахгүй байдлыг далимдуулж  бэлгийн дур хүслээ ёс бусаар хангасан нь хүчиндэх гэмт хэргийн шинжгүй бол зургаан сараас гурван жил хүртэл хугацаагаар хорих ял шийтгэнэ.

2.Энэ гэмт хэргийг арван дөрвөөс дээш арван найман насанд хүрээгүй хүний эсрэг үйлдсэн бол нэг жилээс таван жил хүртэл хугацаагаар хорих ял шийтгэнэ.

3.Энэ гэмт хэргийг бага насны хүүхдийн эсрэг үйлдсэн бол хоёр жилээс найман жил хүртэл хугацаагаар хорих ял шийтгэнэ.

Тайлбар: -Бэлгийн дур хүслээ ёс бусаар хангах гэмт хэргийн хохирогч нь аль ч хүйсийн хүн байж болно.