Согтуугаар жолоо барьж яваад хүний аминд хүрсэн жүжигчин Г.АНАНДАД ГУРВАН жилийн ял оноожээ

Өнөөдрөөс жил гаруй хугацааны өмнө Хан-Уул дүүргийн 15 дугаар хорооны нутаг Их Монголын гудамжинд "Мерседес Бенз Жи-500" маркийн автомашин "Тоёота Премио" загварын автомашинтай мөргөлдөж нэг хүний амь хохирсон хэрэг гарсан байдаг. 

Тухайн үед УБС 0858 дугаартай "Мерседэс Бенз Жи-500" машиныг жүжигчин Г.Ананд согтуугаар жолоодож явсаныг эх сурвалж баталсан. Тэгвэл жил тойрон дуншсан энэ хэрэг хэрхэн шийдэгдсэн бэ? 

•  Г.Ананд нь гэм буруугаа хүлээсэн, тохиолдлын шинжтэй нөхцөл байдалд анх удаа гэмт хэрэг үйлдсэн гэж үзээд гурван жилийн ял хорих ял оноож, жолоо барих эрхийг таван жилээр хассан байна. Согтууруулах ундаа хэрэглэсэн үедээ жолоо барьж, хүний аминд хүрсэн жүжигчин Г.Ананд нь талийгаачийн гэр бүлд 25 сая төгрөгийг хохирлын мөнгө гэж өгсөн бөгөөд шүүгчид бага ял оноосон шалтгаанаа дурьдахдаа тохиолдлын шинжтэй нөхцөл байдлын улмаас анх удаа гэмт хэрэг үйлдсэн гэж үзэж, шийдвэрээ гаргажээ. Мөн гэмт хэрэг үйлдсэн гэм буруугаа хүлээн зөвшөөрч, хэргийн үйл баримт болон гэм буруугийн талаар маргаагүй, гэмт хэрэг үйлдэж, учруулсан хохирлоос амь хохирогчийн оршуулахтай холбоотой зардлын зарим болох 25  сая төгрөгийг хохирогчийн хууль ёсны төлөөлөгчид нөхөн төлсөн, үлдэх хохирлыг баримтаар нотлогдсон хэмжээнд харгалзан нөхөн төлөхөө илэрхийлсэн зэргийг харгалзан үзсэн гэжээ.

Сануулахад, хэрэг гарсны дараа цагдаагийн байгууллагаас "Мерседэс Бенз Жи-500" маркийн тээврийн хэрэгслийн жолоодож явсан Г.Ананд  нь 1 бүхэл 83-ын согтолттой байсан нь самбаачлах хугацаа байхгүй, сэтгэн бодох чадвар удаан, сэтгэлийн хөөрөл их өндөр, үг ярианы тухайд цэгцгүй ойлгомжгүй болчихсон байсан. Ийм зэргийн согтолттой бол тээврийн хэрэгслээр битгий хэл явганаар замын хөдөлгөөнд оролцох чадамжгүй болчихсон гэж ойлгож болно гэж мэдэгдсэн байдаг. 

Мөн талийгаачийн эхнэр гомдолтой байгаагаа илэрхийлж байсан ч жил тойрсон шүүхийн шийдвэр дээрх байдлаар гарсан нь олны анхаарлыг татаж байна.