ШУУРХАЙ МЭДЭЭ: Н.Номтойбаярын ялыг бууруулж нэг жил болголоо

УИХ-ын гишүүн асан Н.Номтойбаярын гомдлыг Улсын Дээд шүүх өнөөдөр хэлэлцлээ. Шүүх бүрэлдэхүүн  таван цаг зөвлөлдөж, дөнгөж сая шийдвэрээ танилцууллаа. Шүүхээс Н.Номтойбаярыu 2 жил нийтийн албанд томилогдох эрхийг хасч, хорих ялыг 1 жил болголоо. Учир нь Н.Номтойбаярын гэм буруутай нь тогтоогдоогүй, харин эрхэлсэн ажилдаа хайнга хандсан гэж үзэн хэргийн зүйлчлэлийг өөрчлөх шийдвэрийг гаргасан байна. 

 Шүүгдэгч Н.Номтойбаяр нь анхан болон давж заалдах шатны шүүхээс 5.5 жилийн хорих ял сонсож, Төв аймгийн Мөнгөнморьт дахь 417 дугаар хорих ангид ялын хугацаагаа эдэлж байгаа юм. 

Сануулахад, Чингэлтэй дүүргийн Эрүүгийн хэргийн анхан шатны шүүх 2020 оны долдугаар сарын 7-ны өдөр УИХ-ын гишүүн асан Н.Номтойбаяр нарт холбогдох хэргийг хэлэлцээд түүнийг Хөдөлмөр нийгмийн хамгааллын /ХНХ/ сайд, Хөдөлмөр эрхлэлтийн үндэсний зөвлөлийн даргаар ажиллаж байхдаа эрх мэдлээ урвуулж, 2017 оны гуравдугаар сард тогтоол гарган, орон нутаг, нийслэлийн онцлог, хэрэгцээнд нийцүүлсэн зорилтот нэгж төслийн төсөвт өртгийг 200 сая төгрөгт багтаан, нээлттэй зарлах удирдамж баталсан.  Хөдөлмөр, халамж үйлчилгээний ерөнхий газрын дарга Б.Нямдаваа, дэд дарга Б.Шижиржаргал, мэргэжилтэн Н.Баттөгс зэрэг хүмүүс хамтран төсөл сонгон шалгаруулах ажлын хэсгийн хурал нэг ч удаа болоогүй байхад хийсэн мэтээр баримт бүрдүүлэн түүнд багтсан гишүүдээр гарын үсэг зуруулж, найман иргэн, 21 аж ахуйн нэгжид 3.9 тэрбум төгрөгийн санхүүжилт олгосон хэрэгт гэм буруутайд тооцсон билээ.

Улмаар шүүхээс Н.Номтойбаярыг  эрх мэдэл, албан тушаалын байдлаа урвуулан ашигласан, худал мэдүүлэг өгсөн гэх үндэслэлээр шүүж, 5.5 жилийн хорих ял оноосон юм.