News Paparazzi: Б.Идэр-Од: Ард иргэдийг битгий бас, битгий давар

Нэгдүгээр төрөхөд амаржсан эмэгтэйг ХӨСҮТ рүү зөөвөрлөн шилжүүлэхдээ хүнлэг бус үйлдэл гаргаснаас үүдэлтэй өнөөдөр өглөөнөөс эхлэн иргэд төв талбайд эсэргүүцлээ илэрхийлж байна. Энэхүү эсэргүүцлийн арга хэмжээнд иргэд, олны танил хүмүүс ирж оролцон байр сууриа илэрхийллээ.

Тэдний нэг “Ub comedy” клубын гишүүн Комедиан Б.Идэр-Од байв. 

Тэрбээр “ Иргэн хүний хувиар бухимдлаа илэрхийлэхгүй бол болохгүй нь. Хөл хориогоор далимдуулан хүний эрхийг таг мартуулах бодлого явж байна. Хүний эрхийн мэдрэмжээ хэзээ ч алдаж болохгүй. Эрүүл мэнд, амь насаа хамгаалуулах эрх байх ёстой. Хүн эрх, эрх чөлөөнийхөө төлөө эцсээ хүртэл тэмцдэг. Ард иргэдийг битгий бас, битгий давар. Монголчууд дарлуулдаг хонинууд биш. Ард иргэд ойлгохын дээдээр ойлгож, дэмжихийн дээдээр дэмжсэн. Дөнгөж төрсөн нялх биетэй эмэгтэйг сэтгэл санааны шоконд оруулж, хөхийг нь зангируулж, хүүхдийг нь орилуулж, тавчиктай оройн цагаар эмнэлгээс зөөвөрлөж байна. Ямар ч хүнд цаг үед Монгол хүн эх орондоо эрхтэй. Гэвч бүтэн жил хилээ хаалаа. Элчингийнхээ үүдэнд хүйтэн шалан дээр Монгол хүн хонож байна. Сэтгэл гаргахгүй байна, шинжлэх ухаанч хандахгүй байна. Чаддаг хүнд нь ажлаа өг л дөө” хэмээн эсэргүүцлээ илэрхийллээ.