News Paparazzi : Батлалцсан хуулиа зөрчсөн гишүүн асан А.Сүхбатыг долоо хоног тусгаарлаж, торгуулын арга хэмжээ авна

Төрийн ордонд заларч, хууль батлалцаж явсан эрхмүүд сүүлийн үед ёс суртахуунгүй үг үйлдлүүдээрээ олон нийтийн дургүйцлийг төрүүлэх болов. Хэдхэн хоногийн УИХ-ын гишүүн асан А.Ундраа цахим орчинд Ерөнхий сайд асан Д.Бямбасүрэнг “үхсэн дээр” хэмээн хэлснийхээ төлөө цахим орчинд шүүмжлэлд өртсөн. 
Тэгвэл УИХ-ын гишүүн асан А.Сүхбат  коронавируст халдварын  цар тахлаас урьдчилан сэргийлэх, тэмцэх хуулийг зөрчсөн үйлдэл гаргажээ. Тодруулбал, А.Сүхбат нь халдвартай бүсээс буюу Улаанбаатар хотоос Дорнод аймаг руу нэвтэрсэн учраас Халх гол суманд тусгаарлагдсан байна. Түүний хувьд халдвартай бүсээс халдваргүй бүсэд зорчиж байгаа хирнээ шинжилгээний бичиггүй, зөвшөөрөлгүй явж байсныг Дорнод аймгийн Шуурхай штаб илрүүлжээ. Эх сурвалжуудын мэдээлж байгаагаар гишүүн асан хурдан удмын адуу авахаар тус аймгийн зорьсон байх магадлалтай гэнэ. Түүний хувьд парламент сууж байхдаа өөрөө кноп даран батлалцсан хуулиа зөрчиж байгаа нь ийнхүү шүүмжлэл дагуулж байна.
 Яг өнөөдрийн байдлаар орон нутаг руу хүнс, эм, нефтийн бүтээгдэхүүн тээвэрлэсэн автомашин л зорчих журам үйлчилж байгаа.  Иймээс Цар тахлын хууль болон УОК-оос гаргасан дүрэм журмыг зөрчсөн учир УИХ-ын гишүүн А.Сүхбатыг унаж яваа автомашиныг нь хураах, торгох санал гараад байгаа аж. Одоогоор түүнийг голомттой бүсээс очсон гэсэн шалтгаанаар долоо хоног тусгаарлах арга хэмжээ авах юм. Харин тусгаарлалтаас гарсаны дараа ямар хариуцлага хүлээлгэх эсэх асуудал яригдах аж.  
Сонирхуулахад, А.Сүхбат нь Toyota, Land Cruiser 200, Hyundai Mighty, Hyundai Porter маркийн 165 сая төгрөгөөр үнэлэгдэх гурван машинтай, 100 орчим адуутай гэдгээ ХОМ-тээ мэдүүлсэн байдаг.