News Paparazzi : Онц хэрцгийгээр хөнөөгдсөн охины ээж Н.ОТГОНТУЯА: Хүү минь хэлмэгдсэн нь батлагдаад, ээждээ хүрээд ирээсэй

Онц хэрцгийгээр хөнөөгдсөн охины ээж Н.ОТГОНТУЯА: Хүү минь хэлмэгдсэн нь батлагдаад, ээждээ хүрээд ирээсэй

-Миний охиныг хөнөөсөн байж магадгүй гурван залуугийн нэгийг нь шалгаж байгаа-

Арваннэгдүгээр сарын 3-нд хичээлдээ яваад ор сураггүй алга болсон 16 настай Г охиныг онц хэрцгийгээр хөнөөж, цогцсыг нь мөчилж, шуудайнд хийн гудамжинд хаясан аймшигт хэрэг арваннэгдүгээр сарын 23-нд бүртгэгдсэн. Эл гэмт хэргийг үйлдсэн байж болзошгүй хэмээн талийгаачийн төрсөн ах С.Ганболдыг цагдаагийн байгууллагаас саатуулан шалгаж байгаа. Харин ар гэрийнхэн нь түүнийг “Дүүгээ хөнөөгөөгүй, хэлмэгдсэн” хэмээн үзэж буй юм. Талийгаач айлын ганц охин бөгөөд бага ах, ээжийн хамт Чингэлтэй дүүрэгт нийтийн байранд амьдардаг байсан. Харин түүний төрсөн хоёр ах нь Сүхбаатар дүүргийн XVIII хороонд тэднээс тусдаа амьдардаг байжээ. Гэмт хэрэгтэн охины цогцсыг мөчилж, хоёр шуудайнд хийн том ах нарынх нь амьдардаг гэрийн ойролцоо хаясан гэдэг. Хэргийн талаар талийгаач охин С.Г-ийн ээж н.Отгонтуяагаас тодрууллаа.

-Юуны өмнө танд эмгэнэл илэрхийлье. Таны бие өвдсөн гэж дуулсан, гайгүй юу?

-Зүрх маш их өвдөж, шаналж байна. Хэрэг гарснаас хойш хэд хэдэн удаа харвах шахсан. Нэг хүү маань ажлаасаа гарч, намайг асарч байгаа. Би ээлжийн ажилтай учраас өнжөөд ажилдаа явдаг юм.

-Хэргийн талаар мэдээлэл өгч болох уу?

-Бид өмгөөлөгч авсан.Хэрэг цагдаагийн байгууллагад шалгагдаж байгаа учраас тодорхой мэдээлэл өгөх боломжгүй байна.

-Хэрэг гарснаас хойш хүүтэйгээ уулзсан уу. Та бүхэн одоо ч гэсэн хүүгээ хэлмэгдсэн гэсэн байр суурьтай байгаа юу?

-Тиймээ, миний хүү хэлмэгдсэн. Дүүгээ хөнөөгөөгүй гэдэгт нь итгэж, тайвширч, амьд явж байна. Ингэж бодохгүй л бол галзуурчих гээд үнэхээр хэцүү байна шүү дээ. Ядаж хүү минь хэлмэгдсэн гэдэг нь батлагдаад ээждээ хүрээд ирээсэй гээд залбирч сууна. Манай хүү дүүгээ хөнөөх хүн яав ч биш. Хэчнээн хүнлэг, төлөв даруу хүүхэд билээ дээ. Тэр жижигхэн биетэй, зүрх муутай, аймхай хүүхэд дүүгээ мөчлөөд, хоёр шуудайнд хийгээд, хаа байсан хол газар яаж алхаж чадах билээ.  Манай өмгөөлөгч хүүтэй минь хэд хэдэн удаа уулзсан. Бидэнд үг дамжуулдаг. Биеийн байдал хэвийн байгаа ч сэтгэл санаа нь тогтворгүй байна гэсэн. Цагдаагийн байгууллага хүүг минь цааш нь харуулж зогсоогоод учир битүүлэг тайлбар авч, олон нийтэд цацсанд маш их гомдолтой байдаг. “Гэр бүлийн хэрүүл сонсмооргүй байсан” гэх утга бүхий дөрвөн секундын ярианаас өөр хүүгийнхээ өгсөн мэдүүлгийн талаар мэдэхгүй. Манай хүүхдүүд хоорондоо таарамжгүй харилцаатай биш. Хаа нэг ам зөрнө, тэгээд л эвлэрчихдэг байсан.

Хүүг минь бидэнтэй нэг удаа уулзуулна гээд дуудсан ч уулзуулаагүй. Яг юунаас болж биднийг уулзуулахгүй байгааг мэдэхгүй юм даа. Хэрэг гарснаас хойш нэг сарын хугацаа өнгөрлөө. Одоог хүртэл хүүгийнхээ царайг хараагүй явна.

-Таны эгчийн хэлж буйгаар архины хамааралтай гурван залуу талийгаачийн аминд хүрсэн байж магадгүй юм билээ. Тухайн залуусыг шалгаж, байцаалт авсан болов уу?

-Тиймээ, охин минь алга болохынхоо өмнөх өдөр эгчийнд очиж хоносон. Ингэхдээ эгчид “Манай гэрийн хажууд орон гэргүй бололтой, архи уудаг гурван ах байдаг. Тэднийг би нэг удаа цагдаад бариад өгчихсөн чинь намайг “ална” гээд байдаг болчихсон. Өндөр, сахалтай ах нь “Чамайг нэг л өдөр цааш харуулна” гээд элдэв янзын хараалаар хараасан. Би тэднээс үнэхээр айгаад байна” гэж ярьсан байгаа юм. Ингэж хэлээд л маргааш нь охин минь хичээлдээ яваад ор сураггүй алга болсон. Тэр гурван залуугийн нэгийг нь барьж, шалгаж байгаа. Нөгөө хоёр нь хөл хорио тогтоохоос өмнө хөдөө явчихсан юм билээ. Тэгээд Улаанбаатар руу орж ирж чадахгүй байгаа гэсэн. Манай өмгөөлөгчөөс тодорхой мэдээлэл авсан нь зүгээр байх.

-Шинжээчийн дүгнэлт гарсан уу. Тухайн үед та “Энэ миний охин биш” гэж байсан шүү дээ. Яг таны охин С.Г гэдэг нь батлагдсан уу?

-Хүн яаж ч бодсон өөрийнх нь хүүхэд тийм аймар болчихсон байхад амар итгэхгүй шүү дээ. Анх харчихаад “Биш байна, биш байгаасай” л гэж бодсон. Гэхдээ миний охин мөн байсан. Шинжээчийн дүгнэлтээр ч миний жаахан охин мөн болох нь батлагдсан.

-Охин тань алга болохынхоо өмнөхөн тантай ярьсан гэдэг байх аа?

-Охин минь хамгийн сүүлд над руу залгаад “Гандангийн ойролцоогоос III, IV хороолол руу явах гэж байна. Удахгүй очно” гэж яриад дахиж холбоо бариагүй. Охины минь гар утас олдсон эсэхийг сайн мэдэхгүй. “Шалгаж байгаа”гэж мэдээлэл өгсөн.