News Paparazzi : Нүхтэд цахилгааны хэрэглээ хоёр дахин өссөн байна

Цахилгаан, дулааны үнийг долоон сарын хугацаанд төр даах болсонтой холбоотойгоор цахилгааны хэрэглээ огцом нэмэгдсэн. Орон сууцны цахилгаан дулааны хэрэглээ 6-7 хувиар нэмэгдсэн бол гэр хороололд хоёр дахин нэмэгдсэн талаар Эрчим хүчний сайд Н.Тавинбэх мэдээлсэн. Үүнээс шалтгаалж хэд хэдэн газар шугмын гэмтэл гараад байгаа. Тиймээс Засгийн газрын өнөөдрийн хуралдаанаар түр журам баталж, өмнөх жилийн мөн үеийнхээс өндөр төлбөр гарвал  зөрүүг y, иргэн, аж ахуйн нэгж өөрөө төлөхөөр болжээ.

Эрчим хүчний сайд Н.Тавинбэх: Цахилгааны төлбөрийг төр даах болсонтой холбоотойгоор хэрэглээ нэмэгдэнэ гэдгийг бид тооцож байсан. Гэхдээ ийм их, бидний тооцож байснаас 2-3 дахин нэмэгдэнэ гэж тооцоогүй. Тиймээс нөхцөл байдлыг ажиглаж байгаад гурав хоногийн дараа Засгийн газраас журам гаргаж байна. Нийт хэрэглээний 96 хувь ахуйн хэрэглээнд байна. Тэр дундаа гэр хороололд байгаа. Тэр дундаа Нүхтэд цахилгааны хэрэглээ хоёр дахин өссөн байна. Иргэд ашигладаггүй байр саваа хүртэл халааж байна. Цахилгаан бол өндөр өртөгтэй бүтээгдэхүүн. Огт үнэ төлбөргүй болоогүй. Төрөөс хөрөнгө мөнгө гаргаж дааж байгаа. Тиймээс иргэдийг цахилгаан, дулаандаа хэмнэлттэй хандаж, бидэнтэй хамтарч ажиллахыг уриалж байна.

Монгол улсын 330 суманд хэрэглээний өсөлт үүссэн. Ялангуяа, Улаанбаатарын бүс нутагт. Улаанбаатар хотын ачаалал өнгөрсөн 2019 оноос долоон хувиар өссөн. Хотын төв хэсэг, Дарь эх, Ганц худаг чиглэлд  ачаалал бууж байна. Харин зуслан, Нисэх, Яармаг, Баянхошуу, Дэнжийн мянга Хайлааст, 1,3-р хороолол, Улаанхуаран, Амгалан, Орбит, Толгойт, Их наран гэх зэрэг чиглэлд ачаалал өндөр байна.