Баримт : Корона ч өсөж, дарга нарын цалин ч өссөн байна

УИХ-ын дарга, Ерөнхий сайд нь тогтоол гаргаад зөвхөн өөрийн болон өөрийгөө тойруулсан түшмэдүүдийнхээ цалинг нэмжээ. Бүтэн жил тойруулж хөлийг нь тушчихаад, бараг дайн болж байна гэж айдаст автуулчихаад амьд үлд гэлүү? аргаа ол гэсэн бил үү?

Улсын төсвөө цахимаар баталсан 13-ны өдөр Т.Доржханд гишүүн “Ирэх оны төсөвт хөгжлийн бэрхшээлтэй иргэдэд олгох ёстой 26 тэрбум төгрөгийг хэмнээд, түүгээрээ УИХ-ын Тамгын газар болон холбогдох албан хаагчдын цалинг өсгөсөн гэдэг мэдээлэл байна” гэж асуухад хариу өгөлгүй өнгөрсөн.

“Төрийн албан хаагчийн албан тушаалын цалингийн сүлжээ, хэмжээг шинэчлэн тогтоох тухай” Монгол Улсын Засгийн газрын 2019 оны 12 дугаар сарын 25-ны өдрийн 472 дугаар тогтоол гарчээ. Энэхүү тогтоолд төрийн гэсэн шошготой бүх байгууллагуудын цалингийн сүлжээг нэмж, 2020 оны 1 дүгээр сарын 1-ний өдрөөс эхлэн дагаж мөрдсөн. Хэдийгээр сонгууль угтсан арга хэмжээ байсан ч багш, эмч, дарга, цэрэг гэлтгүй бүгд хамрагдсан болохоор баярлан хүлээж авсан.

Гэтэл энэ тогтоол хэрэгжиж эхлээд хоёр сар ч бололгүй, Засгийн газрын 2020 оны 75 дугаар тогтоолоор өөрчлөлт оржээ. “Төрийн жинхэнэ албаны зарим албан тушаалын цалингийн сүлжээг тогтоох тухай” Монгол Улсын Засгийн газрын 2020 оны 02 дугаар сарын 19-ний өдрийн 75 дугаар тогтоол гарт минь байна.

Энэ тогтоолын дөрөвдүгээр заалтаар өмнөх 472 дугаар тогтоолын 1 дэх хэсэгт заасан Засгийн газар гэдэг үгийг хүчингүй болгож, дахин шинээр зөвхөн “Засгийн газрын ажлын алба, төрийн захиргааны төв байгууллага буюу яамдын албан тушаалтнуудын цалингийн сүлжээ”-г 40-60 хувиар нэмэгдүүлжээ. 472 дугаар тогтоолоор нэг удаа нэмээд, араас нь 75 дугаар тогтоолоор хүүгийн хүү гэдэг шиг л мангартуулж байгаад дахин дахин нэмээд авчээ.

Ерөнхий сайд аа! Сайд, дарга нарынхаа цалинг нэмж суухад чинь Монгол орон маань “Гамшгаас хамгаалах өндөржүүлсэн бэлэн байдлын зэрэгт шилжсэн” байсныг Та санаж байна уу? Би бол мартаагүй байна.

“Цагаан сарыг цахимаар тэмдэглэнэ шүү!” гэх зуураа олон дарга, түшмэддээ гараа сунгажээ. Та болон таны түшмэдүүд “САР ШИНЭДЭЭ САЙХАН ШИНЭЛСЭН ҮҮ?”

Сонгуулиас ганцхан сарын өмнө, тавдугаар сарын 7-ны өдөр УИХ-ын дарга Г.Занданшатарын гаргасан дөрвөн тогтоол бий. Энэ тогтоолуудад УИХ-ын дарга, дэд дарга, УИХ-ын гишүүн, УИХ-ын даргын зөвлөх, УИХ-ын Ерөнхий нарийн бичгийн дарга, Тамгын газрын тэргүүн дэд дарга, дэд дарга, яамдын ТНБД, газрын дарга ... дандаа дарга нар. Бүүр хамгийн “ШИР” нь УИХ-ын дарга нь өөрийнхөө цалингийн ИТГЭЛЦҮҮР гээчийг баталж нэмсэн байдаг юм.

Итгэлцүүр гэдэг нь үндсэн цалинг итгэлцүүр гэх тоогоор ҮРЖҮҮЛЭЭД, үндсэн цалин дээрээ нэмж авна гэсэн үг. Жишээ нь, УИХ-ын даргын үндсэн цалин 2,0 сая төгрөг гэж бодоход, үүнийгээ 3,03-аар үржүүлнэ. Тэгээд үндсэн цалин болох 2,0 сая дээрээ нэмж авна гэсэн үг. 2,000,000+2,000,000x3,03=8,060,000 төгрөг. Үүн дээрээ удаан жил, онцгой нөхцөл, зэрэг дэв, нууцын гээд нэмэгдлүүд нь орж ирнэ.

“Гамшгаас хамгаалах бэлэн байдлын зэрэгт шилжсэн” үед батлаад, “Гамшгаас хамгаалах бүх нийтийн бэлэн байдлын зэрэгт шилжсэн” үед буюу 2021 оны 01 дүгээр сарын 01-ээс хэрэгжиж эхлэх ТОГТООЛУУД.

Т.Доржханд гишүүний асуултад хариулаагүй шалтгаан чинь энэ мөн үү?

Зөвхөн УИХ, Засгийн газрын аппаратын дарга, түшмэдүүдийн цалинг тусгайлан тогтоол гаргаж нэмж байгаа үйлдэл чинь өөрсдийгөө бусдаас ”ӨӨР” харагдуулах өнцөг болоод байна. Төрийн албан хаагчдыг ялгаварлан гадуурхсан ондоошлыг дагуулсан энэхүү үйлдэл “Төрийн аудитын байгууллагын албан хаагчийн албан тушаалын цалингийн хэмжээг тогтоох тухай” УИХ-ын 2019 оны 56 дугаар тогтоолоос улбаатай. Төрийн албан хаагчдын цалингийн нэгдсэн сүлжээ гэх зүйлийн утгыг нь алдуулж, төрийн гэсэн байгууллага бүр энэ жишгээр чинь “ТОГТООЛ”-ын төсөл сугавчлаад гүйлдэх болсон. Эмч, багш, цагдаа, онцгой гээд “ОНЦГОЙ” хүмүүсийнхээ цалинг ингээд бариад гүйсэн бол баяр хүргэх байлаа. Алга ташиж дахиулах байлаа.

Эх Сурвалж  Said.mn