News Paparazzi : Банкууд хүүхдийн мөнгийг зээлд нь суутгаж, У.Хүрэлсүхийн шийдвэрийг дагасангүй

Ерөнхий сайд У.Хүрэлсүх энэ сарын 19-ны өдөр /2020.11.19/ олон нийтэд мэдээлэл өгч, Засгийн газрын хуралдаанаас шийдвэрлэсэн 23 асуудлыг танилцуулсан. 

Дээрх 23 асуудалд "Банк, банк бус санхүүгийн байгууллагаас зээл авсан иргэд, аж, ахуй нэгжүүдийг нэмэгдүүлсэн хүү, торгууль алданги төлбөр зэрэг нэмэлт татвараас төлбөрийн чадварт нь тулгуурлан гэрээнд өөрчлөлт оруулах хүсэлтээ гаргаад хөнгөлөлтөд хамрагдах, төлбөрийг хойшлуулах" асуудал багтсан. Монгол банк, Санхүүгийн зохицуулах хорооноос зохион байгуулалт, бичиг баримттай холбоотой ажлыг энэ өдрүүдэд гүйцэтгэж буй. Гэтэл банкууд Засгийн газрын шийдвэрээс ангид үйл ажиллагааг явуулж буй тухай гомдол манай редакцид ирлээ. 

Тухайлбал, иргэн Н-ий гурван хүүхдийн мөнгө Хаан банкин дахь дансанд нь өчигдөр 13.00 цагийн үед ороход шууд зээлд нь суутгаж авсан байна. 

Энэ үйл явдал олон ээжид тохиолдсон тухай санал, гомдол сошиал дахь "Ээжүүдийн групп"-т бичигджээ. Бид энэ талаар Хаан банкнаас тодруулахаар холбогдох гэсэн боловч тус банкны лавлах 1800-1917 дугаар өчигдөр ажилласангүй. Мөн дотуур утсаар холбогдох албаны дугаарууд ч хариу өгсөнгүй. Тус банкны зүгээс харилцагчдаа хандан "Хүүхдийн мөнгө болон бусад бүх халамжийг зээлд суутгадаггүй болно. Бүх төрлийн зээлд өөрчлөлт оруулах гэрээг онлайнаар өөрчилж байна" гэх зарыг тавьжээ. 

Гэтэл тэдний уг мэдэгдлийн дор иргэд "Хүнд хэцүү цар тахлын үед дансыг 0 хүртэл мөнгө татсан байна. Арай ч дээ" хэмээн гомдол мэдүүлжээ. 

Мөн ганц Хаан банк гэлтгүй бусад банкууд ч автоматаар суутгадаг хэмээх шалтгаанаар иргэдийн халамж болон хүүхдийн мөнгийг зээлэнд нь суутгасан байна.  Одоогийн байдлаар нийт 1.199.570 мянган хүүхэд хүүхдийн мөнгийг арилжааны 13 банкаар дамжуулан авч байна. Энэ асуудлыг хэзээ, хэрхэн шийдвэрлэгдэх нь одоогоор тодорхой бөгөөд энэ нь банкууд албан ёсны мэдэгдэл гаргахгүй байх, харилцагчийн асуултад хариулахгүй байгаа зэрэгтэй холбоотой юм.