News paparazzi: Борис Жонсон сарын 46 сая төгрөгийн цалингаа голж, ажлаа өгөх бодолтой байгаа гэв

Их Британийн Ерөнхий сайд Борис Жонсон жилийн 150,402 фунт стерлингийн /553 сая төгрөг, сарын 46 сая төгрөг/ цалингаар амьдарч чадахгүй байгаа тул огцрох бодолтой байгаа гэж хамтран ажиллагсдадаа гомдолложээ.

Тэрээр өнгөрсөн жилийн долоодугаар сард Ерөнхий сайд болохоосоо өмнө сард 23 мянган фунт стерлинг /84,5 сая төгрөг/ олдог байсан талаар Telegraph бичиж байв. Гэвч энэ талаар Mirror "Ерөнхий сайд сард хоёр удаа үг хэлснийхээ төлөө 160 мянган фунт авдаг" хэмээн шүүмжилсэн байна.

Харин Их Британийн Засгийн газрын эх сурвалжуудын мэдээлснээр Борис Жонсон Brexit-ыг бүрэн дуусгаж, цар тахлыг даван туулах хүртэл, ойролцоогоор дараагийн зургаан сард ажлаа өгөхгүй аж.

Их Британийн парламентын гишүүдийн нэг нь "Жонсон зургаан хүүхдээ өсгөхөд маш их мөнгө зардаг бөгөөд хамгийн бага хүүдээ жилд 42,500 фунт стерлингийг /167 сая төгрөг/ зарцуулдаг" хэмээжээ. Мөн тэрээр салсан эхнэр Марина Уилерт салалтын гэрээний дагуу цалингийнхаа тодорхой хувийг өгдөг байна. 

Харин өөр нэгэн гишүүн "Түүний энэ үйлдэл ердөө л шунал" хэмээн шүүмжилжээ. Ерөнхий сайдаар ажиллаж байсан болон Засгийн газрын гишүүд аливаа үйл явдалд оролцох, үг хэлэхдээ маш их мөнгө олох боломжтой аж. Тухайлбал Ерөнхий сайд асан Дэвид Камерон нэг удаа үг хэлснийхээ төлөө 120 мянган фунт стерлинг авдаг бол мөн Ерөнхий сайд байсан Тони Блейр зөвхөн лекц уншиж, зөвлөхөөр ажилладаг бөгөөд одоогийн хөрөнгө нь 22 сая фунт стерлинг болсон байна.

Эх сурвалж: Metro, Mirror, Londondaily