News paparazzi: ​Химийн аргаар тайган болсон гэмт хэрэгтэн биеийн байдлынхаа талаар ярьжээ

Казахстаны Туркестан мужид бага насны хүүхдийг хүчирхийлсэн хоёр этгээдийг химийн аргаар тайган болгожээ. Тэдний нэг нь өөрт  төрсөн мэдрэмж, биеийн байдлынхаа  талаар сэтгүүлчдэд ярихыг зөвшөөрсөн байна.

Otyrar.kz мэдээллийн сайтад бичсэнээр, гэмт этгээдүүд чанга дэглэмтэй хориход тус тус 15, 16 жилийн хорих ял эдэлж байгаа аж. Казахстанд 2018 оны нэгдүгээр сарын 1-нд хүчин төгөлдөр болсон хуулийн дагуу тэдэнд тусгай тариа хийх замаар тайган болгосон байна.

Гэмт этгээд “Маш хүнд, дайсандаа ч хүсэхгүй” гээд шийтгэлийн энэ хэлбэрийг цуцлахыг дахин дахин хүссэн байна. Тэрбээр ялаа эдэлж дууссаны дараа гэртээ харьж, гэр бүл, үр хүүхэдтэй болохыг хүсэж байгаа тухай сэтгүүлчдэд ярьжээ. Түүний хэлснээр, тариа хийсний дараа бүх бие нь өвдөж, маш аймшигтай байсан гэнэ.

Гэмт этгээдүүдийн хоригдож байгаа чанга дэглэмтэй хорих газрын орлогч дарга Кахраман Абубакировын хэлснээр, тус хориход бага насны хүүхдийн эсрэг бэлгийн хүчирхийлэл үйлдсэн нийт 78 хоригдол ял эдэлж байгаагаас хоёрт нь шинэ хуулийн дагуу ийм шийтгэл оногдуулжээ. Тусгай тариа нь эр тестостерон дааврын  үйлчилгээг идэвхгүйжүүлснээр бэлгийн хүсэл сонирхлыг нь бүрэн дардаг аж. Тарианы үйлчилгээ тодорхой хугацаанд үргэлжилдэг бөгөөд гурван сард нэг удаа тарих шаардлагатай гэнэ.

Эх сурвалж: zindaa.mn