News paparazzi: Иргэдийн төлөөлөгчдийн хурал бол УИХ-ын гишүүн болоогүй хүмүүсийн буцахдаа залардаг зөөлөн суудал биш

Улс төр судлаачдын урьдчилсан дүгнэлтээр энэ удаагийн орон нутгийн сонгууль нэлээд өрсөлдөөнтэй болно гэх таамаг байна. Учир нь энэ удаагийн сонгуульд өнгөрсөн УИХ-ын сонгуульд нэр дэвшээд өвдөг шороодсон улстөрчид болон нэр бүхий улс төрчдийн хүүхдүүд түлхүү өрсөлдөхөө мэдэгдээд байгаа юм.  

Хэдийгээр сонгуульд өрсөлдөх нь тухайн хүний эрхийн асуудал ч гэсэн саяхан Улсын Их Хурлын сонгуульд өрсөлдөөд өвдөг шороодсон хүмүүс энэ удаагийн орон нутгийн сонгуульд дахин өрсөлдөж байгаа нь хэтэрхий өрөвдөлтэй санагдаж байна. Уул нь Иргэдийн төлөөлөгчдийн хурал бол нутгийн өөрөө удирдах ёсыг төрийн удирдлагатай хослуулах үндсэн дээр нутаг дэвсгэрийнхээ эдийн засаг, нийгмийн асуудлыг бие даан шийддэг байгууллага байдаг. Түүнээс биш ИТХ Улсын Их хурлын гишүүн болоогүй хүмүүсийн буцахдаа залардаг зөөлөн суудал биш.

Харамсалтай нь Монгол төрийн шалгуурт тэнцээгүй эрхмүүд тооноор орж ирэх гэж улайрдгийн тод жишээг улс төрийн зарим нам хүчнүүд түрүүчээсээ харуулж эхлээд байна. Гэхдээ Монголын төр одоохондоо сонгуульд унасан болгоныг урьж залаад, дарга даамал болготлоо доошоо орчихоогүй байгааг энд хэлэх нь зөв байх. 

Төрийн алба өөрийн гэсэн хатуу шалгуур, нарийн дэг жаягтай байдаг. Тэр үүднээсээ энэ удаагийн орон нутгийн сонгуульд өмнө нь УИХ-ын сонгуульд нэр дэвшээд өвдөг шороодсон дээрх эрхмүүд ийнхүү өрсөлдөж байгаа нь “лам олдохгүй бол буцахдаа зална” гэгчийн үлгэр болж байгаатай агаар нэг адил санагдаж байна.

Ж.Бат

Эх сурвалж: paparazzi.mn