Европын Холбоо 30 хоног хилээ хаана

ПАРИС. /TASS/. Европын Холбоо /ЕХ/ гуравдугаар сарын 17-ноос эхлэн хилээ хаахаар болсон тухай Францын Ерөнхийлөгч Эмманюэль Макрон ард түмэндээ хандан үг хэлэхдээ мэдэгджээ.
"Мягмар гаргийн үдээс хойш ЕХ, Шенгений бүсийн хил 30 хоног хаагдана. ЕХ-ны гишүүн бус ба гишүүн орнуудын хооронд зорчих хөдөлгөөнийг энэ хугацаанд түр хааж байна. Европын удирдагчид энэхүү шийдвэрийг даваа гаргийн өглөө гаргалаа" гэж тэрбээр мэдэгдсэн байна.
"Коронавирусний аюул занал бодитоор нүүрлэсэн” гэдгийг Францын Ерөнхийлөгч цохон тэмдэглэжээ. "Бид дайны байдалд байна. Бидний дайсан нүдэнд харагдахгүй боловч давшиж байна” гэж Макрон хэлсэн байна. "Тайван байж, аль болох гэрээсээ гарахгүй байхыг би та бүхнээс дахин хүсч байна” гэж тэрбээр ард түмэндээ хандан хэллээ.
Тэрбээр мөн гуравдугаар сарын 17-ны өдрөөс эхлэн Франц даяар хүмүүсийн хөдөлгөөнийг 15 хоног хязгаарласныг мэдэгдсэн байна. Онцын шаардлагагүй тохиолдолд гэрээсээ гарах, олон нийтийн цугларалт, нийтийг хамарсан арга хэмжээ зохион байгуулахыг хоригложээ. Хоригийг зөрчсөн тохиолдолд хариуцлага хүлээлгэх аж. 
Коронавирусний тархалтыг хумах зорилгоор авсан энэхүү арга хэмжээг иргэд дагаж мөрдөж байгаа эсэхийг 100 мянга гаруй цагдаа хянана гэж Францын Дотоод хэргийн сайд Кристоф Кастанер Парист болсон хэвлэлийн бага хурлын үеэр мэдэгджээ.
Өмнө нь ийм арга хэмжээг коронавирусний халдварын хамгийн олон тохиолдол бүртгэгдээд байгаа Итали, Испани улсууд авсан билээ.