Сурагчдад нэг сарын турш гэрийн даалгавар өгөлгүй зөвхөн сайн үйл бүтээхийг даалгажээ

Бид  нийгмийн харилцаанд оролцох үедээ энэрэнгүй нинжин сэтгэлийг аав, ээж, гэр бүлийнхэн, анд нөхөд, хамт  олноосоо сурсаар байдаг. Харин Ирланд улсын нэгэн сургууль бүтэн сарын хугацаанд сурагчдаа гэрийн даалгавраас чөлөөлж сайн үйлс, сайхан сэтгэл шингэсэн ажил хийхийг уриалан даалгажээ.

Ингэхдээ:

• Даваа гарагт өндөр настнуудад туслах
• Мягмар гарагт гэр бүлийнхэндээ санаа тавьж, өөрийн санаачилгаар гэрийн ажилд оролцох
• Лхагва гарагт өөрийнхөө хүссэн сайн үйлсийг бүтээх. Энэ нь хүүхэд бүрийн сонголтоор өөр өөр байж болно
• Пүрэв гарагт өөрөө өөртөө анхаарал хандуулж, энэрч, хайрлан гадаад төрх, дотоод сэтгэлзүйгээ баярлуулах

Харин Баасан гарагт хүүхдүүд “Сайн үйлсийн тэмдэглэл”-ээ авчирч ирээдүйд бүтээхийг хүссэн сайн үйлсийн жагсаалтыг гаргасан байх юм. Ангийн багш сурагчид дундаасаа нэг хүүхдийн тэмдэглэлийг сонгож бусдад нь уншиж танилцуулна.

Энэ мэт бусдыг ойлгох, бусдын оронд өөрийгөө тавьж үзэх, энэрч, туслах зэрэг хүн бүрт байх ёстой чанарыг багаас нь сургуулийн орчинд сонирхолтой аргаар заах нь хүмүүжил олгох зөв сургалт ажээ.