Үхсэн малын болон муудсан мах зарахыг завдсан Хятад иргэдийг хорьжээ

БНХАУ-ын хоёр иргэн 25 тонн муудсан махыг худалдан авч, хадгалж байсныг өчигдөр /2019.05.23/Эрүүгийн цагдаагийн газрын алба хаагчид болон Мэргэжлийн хяналтын ерөнхий газраас илрүүлжээ.

Тодруулбал, Сонгинохайрхан дүүргийн 23 дугаар хороонд байрлах  "Эмээлт" захын хажуугийн агуулахаас дээрх хэмжээний өмхийрсөн махыг зориулалтын бус газар хадгалж, өнгө оруулагч ашиглан шинэ мэт болгож борлуулах зорилготой байсныг тус улсын иргэд хүлээсэн аж. Энэ хэрэгт холбогдуулан БНХАУ-ын иргэн Ю, Б нарыг хойшлуулшгүйгээр сэжигтнээр тооцон баривчилж, 461 дүгээр ангид саатуулжээ.

Нийслэлийн мэргэжлийн хяналтын газраас муудсан махнаас дээж авч шинжилгээнд өгсөн байна. Тус газраас мэдээлснээр “Эмээлт” захаас муудсан махыг өнгө оруулагч бодис ашиглан борлуулах гэж оролдсон хоёр дахь тохиолдол нь энэ  аж. Хүнсний аюулгүй байдалд анхаарч, томоохон  худалдааны төвүүдээр  Нийслэлийн мэргэжлийн хяналтын газрын улсын байцаагчид хяналт тавьж ажиллаж байгааг тус газрын Олон нийттэй харилцах хэвлэл мэдээллийн ажилтан Д.Даариймаа хэлэв.