УИХ-ын даргыг өөрийн хүсэлтээр ажлаа өгөхийг шаардсан тогтоол батлагджээ

Тусгаар тогтнолын ордонд МАН-ын  Бага хурал 21.00 цагийн орчимд завсарлаж, МАН-ын Удирдах зөвлөл хуралдаж эхэлсэн юм. Удирдах зөвлөлийн хурлаар УИХ-ын дарга М.Энхболдыг өөрийн хүсэлтээр ажлаа өгөх саналыг тавьсан боловч М.Энхболд хүлээж аваагүй гэсэн мэдээлэл ирсэн. Улмаар Удирдах зөвлөлийн хурал өндөрлөж, Бага хурал хуралдаж эхэлсэн бөгөөд УИХ-ын даргыг өөрийн хүсэлтээр огцрох өргөдлөө өгөх нь зүйтэй гэсэн тогтоолыг өчигдөр орой баталлаа.

МАН-ын дарга У.Хүрэлсүхийн гаргасан саналын дагуу батлагдаж байгаа уг тогтоолыг 90 гаруй хувийн саналаар баталсан гэх мэдээлэл байна. 

Өөрөөр хэлбэл, УИХ-ын дарга М.Энхболд Бага хурлын тогтоолоор үүрэгт ажлаа өгөх улс төрийн шийдвэр гарч байна.