Су.Батболд бусдын дарамтанд орж, өргөдлөө өгсөн үү?

Нийслэлийн Засаг дарга бөгөөд Улаанбаатар хотын захирагч С.Батболд өчигдөр албан тушаалаасаа огцрох өргөдлөө гаргав.

Түүнийг огцруулах асуудлыг өчигдөр НИТХ-аар хэлэлцэх үед АН-ын бүлэг завсарлага авч долоо хоног хойшлуулаад байсан ч тэрээр ийн гэнэтийн шийдвэр гаргасан байна. 

Түүний энэ шийдвэрийн талаар Нийслэлийн ЗДТГ-ынхан, хамтран зүтгэгчид нь ч огт мэдээгүй байсан бөгөөд өөрөөр хэлбэл тэрээр өргөдлөө өгөхөөр гэнэт л шийдсэн бололтой.

Үүнтэй зэрэгцэн улс төрийн хүрээнд нэгэн хачирхалтай яриа гарах болов.

Тодруулбал МАН-ын удирдлагуудын нэг нь Нийслэлийн Засаг дарга бөгөөд Улаанбаатар хотын захирагч С.Батболд руу гурван фото зураг явуулсан, хэрэв албан тушаалаа өгөхгүй бол уг зургуудыг олон нийтэд дэлгэнэ гэсэн бололтой.

Өөрөөр хэлбэл Су.Батболд бусдын дарамтанд орж, өргөдлөө өгсөн байж мэдэх гэнэ.

П.Мандах