Матрын нулимс унагасан О.Мөнхжин хуулийнхныг мөнгөөр зодох нь

Монголд гурван том хэрэг гарчхаад байгаа. Эхнийх нь “Хөгжлийн банк”-ны, дараагийнх нь “Нүүрсний хулгай”-н, дараагийнх нь “Койны хэрэг”. Аль аль нь л олны анхаарал татаж байгаа. Гэхдээ койны асуудал өнгөрсөн онд эхэлсэн ч одоо “эрчээ авч” хохирогчид нь ч шил шилээ даран гарч ирсэн.

Тэгвэл койноор олон түмнийг мэхэлж ихээхэн хэмжээний мөнгө завшсан О.Мөнхжин гэгч залуугийн жүжиг олны дургүйг зэгсэн хүргэв бололтой.
Тэрбээр хэдхэн хоногийн өмнө уйлан дуугарч “Монголд ямар хэцүү юм бэ... Би буруу юу хийсэн юм. Өөрөө ч хохирчхоод байна. Хуурай өлсгөлөн зарлана...”гэх зэргээр ёстой л матрын нулимс унагаж байсан. Гэтэл тэр койноор 30 тэрбум төгрөг төвлөрүүлсэн бөгөөд түүнийхээ 2 тэрбумаар нь 10 орчим өмгөөлөгч, хуулийн 2 фирм хөлсөлчхөөд ёстой л үзэж тарж үсэрч наалдана гэж байгаа тухай хэвлэлүүд гэлтгүй цахим орчинд шуурч эхлэв.
Ард иргэдийг хуурч олсон мөнгөнийхөө 6.6 хувь буюу 2 тэрбумаар нь ийнхүү өөрсдийгөө өмгөөлж уснаас хуурай гарахаар том өгөөш хаяж байгаа бол түүнд хууртсан иргэдийн амьдрал орвонгоороо эргэчхээд зарим нь гудамжинд хүүхдээ хөтлөөд гарчхаад байгаа.
Уг нь хууртсан өч төчнөөн иргэний хохирлыг барагдуулчихвал, О.Мөнхжин болон түүний хамтрагч нарын ял зэм 2 тэрбумтай тэрбумгүй багасч мэдэх л юм.
Товчхондоо бол О.Мөнхжин түүний хамтрагч Б.Гантиг, Б.Эрхэмбаяр нар “Хүний үнэр” гаргах юм бол хэрэг явдал аятайхан цэгцэрнэ гэсэн үг. Тэгээд ч матрын нулимс унагаж байсан О.Мөнхжингийн энэ үйлдэл нь цаашид ч хуулийнхныг мөнгөөр зодох нь гэж харагдаж байгаа учраас олон нийт бухимдаж эхэллээ.