Хөшигийн хөндийд ноёлогчид менежментийн гэрээгээр бамбайлсаар байх уу

Монголчууд олон улсын стандартад нийцсэн нисэх буудалтай болсон ч баярлах болоогүй л байна. Хөшигийн хөндийн нисэх буудлын 49 хувийг “Хөшигийн хөндийн нисэх онгоцны буудал” ТӨХХК эзэмшиж буй. Харин 51 хувийг япончууд.

Гэвч тус буудлын барилга байгууламж л юм үзээгүй монголчуудын анхаарлыг татаж, бусдаар бол олон нийтийн бухимдлыг төрүүлсээр байгаа.
Үүнийг нь бататгаж БОАЖ-ын сайд Б.Бат-Эрдэнэ тус нисэх буудалд очиж ажиллахдаа эрүүл ахуйн шаардлага хангахгүй байгааг нь цахим орчинд түгээсэн. Гэхдээ мань сайдыг “баалж” байгаагаас Хөшигийн хөндийн нисэх буудал Монгол Улсад айлчилж, аялж буй гадна, дотнын хүмүүсийн анхны үнэлгээ өгөх газар гэдгийг огтхон ч тоосонгүй, анхаарсангүй.
Үнэндээ Монгол Улсыг сурталчлах үйл ажиллагаа, мэдээллийн орон зай тус буудалд тун дутмаг. Салбар яамнаас санал тавьдаг ч менежмент хариуцагчаас байнга түдгэлзсэн, болохгүй, боломжгүй гэдэг хариулт өгдөг аж.
Ингээд ч зогсохгүй зарим авиа компани, иргэд, аж ахуйн нэгжүүд тус олон улсын нисэх буудал нь Японы Нарита олон улсын нисэх буудлын хэмжээний төлбөрийг авдаг ч тийм хэмжээний үйлчилгээг үзүүлдэггүй хэмээн шүүмжилсээр байдаг.
Түүнчлэн албаныхан шаардлага тавихаар Чингис хаан Олон улсын нисэх буудлын менежмент хариуцагч компаниас “Менежментийн гэрээ”-ээр ажиллаж байгаа хэмээн амыг нь хаадаг аж.
Тиймээс тус буудлын үйл ажиллагаа цаашид сайжрахгүй, хэвийн хэмжээнд хүргэхгүй бол менежментийн гэрээг эргэн харахаас аргагүйд хүрч байгаа юм. Угаас хэдий гэрээ байгуулсан үүргээ биелүүлэхгүй бол цуцалж болдог гэдгийг харуулах л хэрэгтэй болчихсон нь үнэн.