Халиа, тошингийн 330 тэрбумыг хэмнэх “Сэлбэ сэргэлт”

Нийслэлийн дөрвөн дүүргийн нутаг дэвсгэрт халиа, тошин үүсдэг. Тухайн халиа гүйсэн мөсийг цэвэрлэхэд 330 тэрбум төгрөг шаардлагатай гэж Улаанбаатар хотын захирагчийн ажлын албанаас сарын өмнө мэдээлсэн.

Сонгинохайрхан, Сүхбаатар, Чингэлтэй, Баянзүрх дүүргүүдэд халиа дошин үүсэх эрсдэл өндөр байдаг бөгөөд тухайн хэсгүүдэд нийт 200 гаруй айл өрх байдаг. Энэ жил хөрөнгө оруулалтын хувьд 26 тэрбум төгрөг төсөвлөжээ
Энгийнээр тайлбарлахад ерөнхий боловсролын хоёр сургууль барих хэмжээний мөнгө.
Тэгвэл үүнийг хэмнэх боломж нь “Сэлбэ сэргэлт” төсөл. Нийслэлийн Ерөнхий архитектор Н.Нацагдоржийн боловсруулсан уг төслийг богино хугацаанд буюу бүтээн байгуулалтын улиралд л хэрэгжүүлчих боломжтой. Харин үр дүнгийн хувьд авто замын түгжрэлийг 30 хүртэл хувиар бууруулах, гол дагуу инженерийн шугам сүлжээг хонгилын системд шилжүүлж, гэр хорооллын барилгажилтыг дэмжих, хотын эко системийг тэнцвэржүүлэх, голын урсцыг нэмэгдүүлэх, агаар, хөрсний бохирдлыг бууруулах зэрэг ач холбогдолтой.
“Сэлбэ сэргэлт” төслийн хүрээнд голын дагуух Дамбадаржаагийн цэцэрлэгт хүрээлэнгээс Сонсголонгийн гүүр хүртэл 21.6 км буюу 2 талдаа нийт 43.2 км далан, авто замын сүлжээ байгуулахаар төлөвлөгдсөн. Энэ нь халиа, тошин ихээр үүсдэг Сүхбаатар, Чингэлтэй, Баянзүрх дүүргүүдийн нутаг дэвсгэрийг хамарна.

 
Ингэснээр Сэлбэ голын үерийн хамгаалалтын далангүй, ил задгай урсаж байдаг 70 хувь нь “хашилт”-тай болно гэсэн үг.
Тэгэхээр хүссэн, хүсээгүй дээр дурдсан 330 тэрбум төгрөгийг хэмнэх боломжтой болж байна.
Эхний ээлжинд БХБ-ын сайд Ц.Даваасүрэн, Хотын дарга Д.Сумъяабазар нар “Сэлбэ сэргэлт” төсөлтэй танилцсан бөгөөд үр өгөөжийг нь үнэлээд, Засгийн газарт танилцуулахаар болжээ.