Б.Баярсайхан гишүүн ээ, баярлах болоогүй

УИХ-ын гишүүн Б.Баярсайхан ХНХ-ын сайдын суудал руу “чичирсэн” хэвээр явна. Учир нь, ХНХ-ын сайд Т.Аюурсайхан Ерөнхий сайд Л.Оюу-Эрдэнэд чөлөөлөгдөх хүсэлтээ өгсөн бөгөөд өнөөдрийн Засгийн газрын хуралдаанаар шийдвэрлэх юм.

Үүнтэй зэрэгцээд дараагийн сайд хэн байх вэ гэдэг таамаг олон нийтийн дунд хөвөрсөн бол МАН-ын гишүүдийн дунд аль хэдийн буухиа нь эхэлчихсэн. Эхлэх ч гэж дээ, өмнө нь УИХ-ын гишүүн Б.Баярсайхан, М.Оюунчимэг нарын нэр яригдаж байсан. Гэвч МАН-ын Удирдах зөвлөл Т.Аюурсайханыг дэмжсэнээр эмэгтэй гишүүдийн нэр дарагдсан. Харин энэ удаа Б.Баярсайхан улстөрийн дэмжлэг сайтайн хэрээр өөрийгөө онцлуулах гэж ихэд хичээж байгаа аж. Гэвч түүнд сайдын суудал тохирохгүй гэдгийг МАН-ын Удирдах зөвлөлийн зарим гишүүд хэлж, “таалах”-гүй байгаа сурагтай. Өмнө нь мань Б.Баярсайханыг БШУЯ-ны Төрийн нарийн бичгийн даргаар томилсон ч сайдтайгаа хамтран ажиллаж чаддаггүй, бусад ажилтнуудыг талцуулдаг гэхчлэн яамныхан түүнийг үдэхийн түүс болж байсан. 

Тэр ч утгаараа МАН-ын УЗ Б.Баярсайхан болон түүний дэмжигчдийг хүлээн зөвшөөрөлгүй үлдээсэн. Тиймээс л эхний хүнээ сайдын суудлаас чөлөөлж ч амжаагүй байхад л баярлан гүйж яваа бололтой.

Мань Б.Баярсайхан гишүүний хувьд Засгийн газрын бүрэлдүүнд өөрчлөлт орох бүрд сайдын суудал руу гэтдэг гэх "жиргээ" Төрийн ордноор "нисдэг" болсоор удаж буй. Түүнийг нь батлах гэсэн шиг Б.Баярсайхан гишүүн ч сайдуудыг ёстой л "нар өөд үзүүлэхгүй" гэсэн шиг бараг хурал, чуулган бүр дээр загнаж, зандардаг болсон. Арга ядсан зарим нь "Хөөрхий түүний шуналыг дарж МАН давхар дээл өмсүүлээсэй" гэж залбирах нь холгүй хошигнох болж. Юутай ч МАН-ын УЗ төрийн албыг хэн дуртайд нь бус хийж чаддагт нь өгөх ёстойгоо мэдэж л байгаа байх даа.