“БОДЬ ИНТЕРНЭШНЛ”, “ЮНАЙТЕДБЭНКИНГ КОРПОРЭЙШН” ГРУППУУД ИПОТЕКИЙН 170 ТЭРБУМ ТӨГРӨГӨӨ БУЦААЖ ӨГ

Монголбанк, Санхүүгийн зохицуулах хороо арилжааны банкуудтай нийлж, хуйвалдан 170 тэрбум төгрөгийг хөрөнгө оруулалт гэж нэрлэн мөнгө угаасан нь тодорхой болчихлоо.

Тодруулбал, Монголын Ипотекийн корпораци орон сууцны хөнгөлөлттэй зээлийн санхүүжилтийн хөтөлбөрийн хүрээнд тусгай зориулалтын компаниудын нөөц сангийн хөрөнгөөс “Юнайтадбэнкинг корпорэйшн” ХХК-д 150 тэрбум, “Бодь интернэшнл” ХХК-д 20 тэрбум төгрөгийг хөрөнгө оруулалт болгоод өгчхөж. Үүнийгээ өнөөг хүртэл аваагүй.
Гэтэл иргэд ирэх оноос ипотекийн зээлийн эргэн төлөлтөө хийхгүй бол дахин санхүүжүүлэх боломжгүй болчихлоо хэмээн холбогдох байгууллагууд бараг л матрын нулимс унагаж байсныг яана. Тэгж байж дараагийн ээлжийн хүмүүс өртэй ч болов орон сууцтай болно шүү дээ хэмээн нийгмийн үүрэг, хариуцлага гэх зүйлс ярьж байсан нь ч саяхан.
Атал том компани, группууд иргэдийн ипотекийн зээл авах боломжийг нь хулгайлчхаад чимээгүй явсан хэрэг.
Тиймээс Шадар сайдын С.Амарсайхан Монголбанк, Санхүүгийн зохицуулах хороо ипотекийн зээлийн эргэн төлөлтөөс 170 тэрбум төгрөгийг арилжааны банкуудтай үгсэн хууль бусаар ашиглах, мөнгө угаах гэмт хэрэг үйлдсэн инфляц, төгрөгийн ханшийг барьж чадаагүй хэмээн үзэж Төвбанкны ерөнхийлөгч Б.Лхагвасүрэн, СЗХ-ны дарга Л.Баярсайхан нарыг огцруулж, АТГ-т шалгуулна гэж мэдээлсэн.
Угаас ипотекийн зээлийн хүүг бууруулж, урьдчилгаа төлбөрийг 20 хувьд хүргэх боломжтой байсан талаарх ажлын хэсгийн дүгнэлт гарсныг Шадар сайд С.Амарсайхан өнгөрсөн лхагва гарагт Засгийн газрын хуралдаанаар оруулсан билээ.