М.Билэгт төрд 60 тэрбумаар шахаж чадаагүй эмнэлгээ Хөгжлийн банканд 68 тэрбумаар өгөх нь

УИХ-ын гишүүн асан М.Билэгт хохирох биш бүр завшчихаж. Тэр “Ачлал трейд” компанийнхаа нэрээр Хөгжлийн банкнаас 2017 онд 15 сая ам.долларын зээл авсан бөгөөд өдгөө нийт үлдэгдэл 23.796.651.1 ам.доллар буюу 68 тэрбум 508 сая төгрөг болчхоод байгаа.

Гэтэл өнөөх гишүүн асан зээлийн өрөндөө “Ачлал оточ” буюу Дөрөвдүгээр эмнэлгээ өгье гэх тохироотой яваа сурагтай.

Тодруулбал, тэр хэдхэн жилийн өмнө төрд тухайн эмнэлгийн барилгаа 60 тэрбум төгрөгөөр шахна гэж зүтгэж байсныхаа энд хүргэж байна гэсэн үг.

М.Билэгт УИХ-ын гишүүн байхдаа эмнэлгийн барилгаа 60 тэрбум төгрөгөөр шахах гэхэд УИХ-ын байнгын хороо болон ТӨБЗГ-ынхан хэт өндөр үнэтэй гээд хүлээж аваагүй. Мань гишүүн ч гандан буурахгүй тухайн үеийн Эрүүл мэндийн сайд Д.Сарангэрэл хичнээн ч удаа албан бичиг чулуудаж, ХӨСҮТ-ийн захирал Н.Эрдэнэхүүг загнаж, зандарч, заримдаа уйлж, дуулж, учирлаж байсан билээ дээ.
Гэтэл одоо Хөгжлийн банкны зээлийнхээ өрөнд буюу 68 тэрбум төгрөгт тооцож өгөх тухай яригдаж байгаа нь хэт хөөсөрсөн үнэ гэж хэлж болохоор байгаа юм.
Учир нь өнгөрсөн хугацаанд Дөрөвдүгээр эмнэлгийн барилга ашиглалтад орж, мань хүн тодорхой хэмжээгээр ашиг олсон. Түүгээр ч зогсохгүй төсвөөс түрээсийн мөнгө авч байсан зэргээс нь тооцож харвал анх 60 тэрбум төгрөгөөр төрд шахах гэж байснаас нь багассан л баймаар.
Харин өнөөдөр ёстой л оргүйгээс охинтой нь гэсэн шиг тухайн үедээ 60 тэрбум ч хүрэхгүй гэж байсан эмнэлгийн барилгаа 68 тэрбум болгож өсгөж авах гэж байгааг хэрхэн ойлгох болж байна вэ.
Цагтаа мань гишүүн асан М.Билэгт ХСҮТ-ийн захирал Н.Эрдэнэхүүг “За яах вэ, сонгууль болоод өнгөрөг. Тэрний дараа би Засгийн газрыг Арбитрын шүүхэд өгнө. Нэг жил л хүлээх биз. Тэгээд би хохирлоо гаргуулчихна. Засгийн газар манайхыг алдагдалгүй болгохын тулд буруутай этгээдээр хохирлыг барагдуул гэнэ. Тэгэхээр та төлж чадахгүй юм чинь шоронд л орох байх даа” гэж сүрдүүлж явсан хүн шүү дээ.
Гэтэл өөрөө цаагуураа Засгийн газар байтугайг хохироочхоод л явж байсан байх нь.