“Хишиг арвин”-ы гай буюу нүүрсний хулгайн хар мөр хэдэн айлыг орох оронгүй болгох бол

Нүүрсний хулгайн хэрэгтэй холбоотойгоор “Хишиг Арвин Индустриал” компанийн захирал Б.Хишигдоржийг баривчилж, гэр болон оффист нь нэгжлэг хийсэн. Түүнийг “Эрдэнэс Тавантолгой”-иас зарласан тендерүүдийг хамдаг байсан нь ийн нүүрсний хэргийн хамсаатан болгосон. Нүүрсний хэрэгт холбогдсон энэ компаниас болж тун удахгүй дараагийн хохирогчид бий болох нь ээ. Учир нь "Хишиг Арвин Индустриал” өмнө нь улсын комисс хүлээж аваагүй барилгатаа ажилтнуудаа амьдруулж байсан бөгөөд тэнд нь нэг хүн нь нас барсныг нуун дарагдуулсан хэмээн захирал Б.Хишигдорж нь хуулийн хариуцлага хүлээж байсан. Тухайн хугацаанд барилгын компанийнхаа нэрийг “Хур алтан өргөө” болгож, охин компани байгуулсан нь саяхан. Энэхүү охин компанийг нь түүний хүү Х.Батхишиг эзэмшдэг бөгөөд энэ оны хоёрдугаар сард Сонгинохайрхан дүүргийн 18-р хороо буюу 5 шар орчмын СТ-01, СТ-02, СТ-03, СТ-04, СТ-05 дугаар байруудыг буулган, шинээр барилгажуулах төсөл авсан. Тухайн орон сууцуудыг барьснаар 160 өрхийн 700 гаруй иргэн эрүүл, аюулгүй орчинд амьдрах нөхцөл бүрдэх учиртай. Тэгвэл толгой компани нь нүүрсний хэрэгт холбогдсон энэ компани цаашид барилгын салбартаа үйл ажиллагаагаа хэвийн явуулах эсэх нь тун ч эргэлзээтэй болчихлоо. Угаас нүүрсний хулгайн мөнгийг ихэнхдээ барилгын салбарт “угаадаг” гэх мэдээлэл ч бий. Тиймээс орон сууцны дахин төлөвлөлт нэрээр “Хур алтан өргөө” толгой компанийнхаа “хар мөртэй” хөрөнгийг “шинэчилдэг” байсан юм биш байгаа гэх хардлагыг төрүүлж байгаа юм.