Сайд аа, ядуурлыг бууруулах  арга чинь ядмаг байна

Уг нь энэ нам нэгэн бүл, цөм болж чадсан учраас УИХ-ын 2020 оны сонгуульд ялалт байгуулж гарч ирсэн гэж ард иргэд ойлгодог.  Тэгвэл  яагаад гарч ирсэн шигээ ажиллаж  яагаад чадахгүй салж, төөрсөн хачин, хачин юм ярьж олныг бухимдуулдаг юм бол оо.

Их хурлын дарга нь “Дарханы нэхий эдлэлийн үйлдвэрт 1000 ажилчин ажиллах ёстой. Гэтэл одоо тэнд 420 ажилчин л ажиллаж байна. Цаана нь бараг л 600 ажлын байр байж байна” гэж хэлээд 2 ч хоноогүй байхад  Засгийн газрын гишүүн, ХНХ-ын сайд Д.Сарангэрэл хачин жигтэй юм  ярьж олныг бухимдуулав. Тэрбээр  “Улны 1500 өрхөөс нэг нэг гишүүнийг нь үсчний дамжаанд суулгаж тэднийг ядуурлаас гарахад нь дэмжлэг үзүүлнэ гэв.

Тооцоотой судалгаатай ярих хэрэгтэй. Тэр тусмаа төрийн сайд хүн.

Уг нь  тэрбээр Хятадын Засгийн газраас гаргасан Өвөрмонголчуудыг ядуурлаас гаргах санааг хуулж буй юм шиг байгаа юм.

Тэгвэл манай улсад хамгийн их шаардлагатай байгаа мэргэжил бол сувилагч. Хоёр жилийн өмнө 13 мянган сувилагчийн ажлын ачааллыг 8000 сувилагч үүрч, мөрлөж явна гэх мэдээлэл гарч байв.  Бараг энэ мэдээлэл “Хатан ижий”-гийн  өөрийнх нь хийж байсан мэдээлэл ч байж мэднэ. Тэгвэл ашиг хонжоо бус алсыг харсан  шийдвэр гаргаж яагаад болдоггүй, чаддаггүй юм бэ.  

Тэгээд ч олны бухимдах нь зөв. Учир нь тэд  “ Нөгөө хатан ижий чинь баахан сэнс, сам, хайч, үсний машин оруулж ирж Хятадын эдийн засгийг дэмжих нь...” гэж байна. Яг ингэж ойлгогдож байгаа учраас ингэж дүгнэхэд хүргэж байгаа хэрэг.   

Үнэндээ сам, хайч гэх мэт зүйл оруулж ирж байхаар ногоо цагаа тарих, хувцас эсгэх оёхыг заагаад өгчихвөл хол дээр, жинхэнэ нүдээ олсон шийдвэр болно.

Тэгээд ч  “Бэлэн загас өгөх бус барих аргыг нь зааж өг” гэдэг биз дээ. Хэрэв зөв, оновчтой шийдвэр гаргаж чадвал бултаараа шахам улны ард чинь ёстой дорхноо л түрийний хавьцаа ирчихнэ шүү дээ.