С.Одонтуяа Боомт хариуцсан сайд болохоор АН-ын бүлгээ баталгаажуулахаар зүтгэж байна

 Засгийн газрын бүтцэд өөрчлөлт оруулсан МАН-ынхан Боомт хариуцсан суудлаа эзэнгүй орхиж, олон хүний анхаарлыг татсаар байгаа. 

Тэрхүү суудлыг УИХ-ын дэд дарга С.Одонтуяад үлдээсэн талаар эх сурвалжууд хэлж байна. Үүнийг нь баталж С.Одонтуяа Засгийн газрын шинэ сайдууд тангараг өргөмөгц “Нэгнээ угтан алхацгаая” найр тавих нь эвийн эхлэл хэмээн уриалга гаргасан. Тэр “Өнгөрсөн хугацаанд 2 хуваагдаж ардчиллын лидерүүдрүүгээ шороо цацалцаж, өөр хоорондоо захиалгат хар пи-ар явуулснаа улс төр хийлээ гэж ойлговол том эндүүрэл. Бүтэн нэртэй ч хүн үлдсэнгүй. 
Улсын хөгжлийн төлөө л улс төр оршдог. Үндэсний эрх ашгийн төлөө л улс төрждөг байх ёстой. Улс төр дэх бурууг хатуу шүүмжилж анхааруулах, бүр тэмцэх ёстой. Зөвийг дэмжиж, уухайлан түгээх ёстой. Бид цаг үеийнхээ дуудлага, шаардлагад нийцэж эс чадваас улс төрийн тавцангаас арчигдан, монголын ардчилал алсран одоход ойрхон байгааг намын гишүүн, дэмжигч бүр ухамсарлан эвийг эрхэмлэн, нэгдлийг бүтээхийг би уриалж байна. Бас шаардаж байна.” гэж байв. 
Товчхондоо өөрөө сайдын сэнтийд залрах гэхээр гадаад ертөнц байтугай УИХ дахь АН нь ч бүлэггүй байгаа нь С.Одонтуяад чөдөр болчхоод байгаа. Тиймээс л мань хүн тийн уриалга гаргасан хэрэг. 
Нөгөө талаас Ерөнхий сайд Л.Оюун-Эрдэнэ АН-ынханд хандан ядаж УИХ дахь бүлэгтэй болчих гэдэг шаардлага тавиад байгаа аж. Тиймээс УИХ дахь АН-ын гишүүд нэгдэх гэж улайрахаас ч аргагүй. 
С.Одонтуяатай хамт Ц.Тувааныг Эрүүл мэндийн сайдаар томилж өгөх тохироо ч явчихсан. Хамгийн гол нь дотоод эв нэгдлээ хангаж чадаагүй байгаа учраас АН-ын нэр бүхий гишүүд ихэд сандарч, сайдын суудалгүй хоцрох, МАН ҮХНӨ-ийг хийх боломжгүй болчих гээд буй аж. 
Энэ бүхнийг нэг дор цэгцлэлж, сандарч буй нөхдийг сэтгэл амар байлгахын тулд Боомт хариуцсан сайдын суудлыг хоосон орхиж, хичнээн элдвээр хэлүүлж байгаа Эрүүл мэндийн сайдын суудлыг ч оролдохгүй хадгалсаар байгаа. 
Эргээд харахад хэд хоногийн өмнө сайдуудын суудлаа сэлгэсэн Ерөнхий сайд Л.Оюун-Эрдэнэ нэгэнтээ “Эв нэгдлийн Засгийн газар байгуулах” тухай ам алдсан нь ч дээрхийг бататгаж байгаа юм.