МАН 11 сард Бага хурлаараа дараагийн генсекээ тодруулна

МАН-ын Ерөнхий нарийн бичгийн дарга Д.Амарбаясгалан Засгийн газрын ХЭГ-ын дарга болж түүний хэн хаших вэ гэсэн яриа олны анхаарлыг татаж байна. 

Мэдээж түүний албыг залгуулах хүн МАН-д тулхтай, туршлагатай төдийгүй түүн шиг чадварлаг байх ёстой гэсэн хүлээлт байгаа нь нууц биш.
Одоогоор түүний орыг залгах хүнээр Д.Амахбаясгалантай хамгийн ойр шадарлаж байсан хоёр хүний нэр дуулдаж байгаа ч Л.Оюун-Эрдэнийн Засгийн газарт сайдын суудалгүй үлдсэн бас бус УИХ-ын гишүүд ч генсекийн суудал руу тухлахаар зүтгэж эхэлсэн. Хэдийгээр энэхүү чухал суудалд олон хүн санаархаж байгаа ч хүссэн нэгэнд нь очих суудал биш гэдгийг тус намын гишүүд андахгүй мэднэ.
Тухайлбал, дараагийн удаа тодрох МАН-ын генсек 2024 оны парламентын сонгуульд намынхаа мөрийн хөтөлбөр болон хэн, хэнийг УИХ-д нэр дэвшүүлэх, хэнийг жагсаалтаар оруулах зэрэг олон ажлыг гардан гүйцэтгэх учраас зүгээр ч нэг дурны хонгио уг суудал руу өнгийхгүй гэсэн үг. 
Тус намд Д.Амарбаясгалан шиг МАН-ын гал тогоог аваад явчих лидер байхгүй учраас МАН-ын гишүүд дүрэмдээ өөрчлөлт оруулж түүнийг генсекээр нь үлдээе гэсэн саналыг ч МАН-ын дарга, Ерөнхий сайд Л.Оюун-Эрдэнэд хүргүүлсэн гэх. Учир нь Д.Амарбаясгалан МАН-ыг хоёр сонгууль дараалан ялалтад хүргэснээс гадна Ерөнхийлөгчийн сонгуулийн буухиаг намдаа авчирсан нэгэн. 
Нөхцөл байдал ийм учраас магадгүй Ерөнхий сайдын зүгээс давхар нүүдэл хийж Д.Амарбаясгаланд Засгийн гал тогоог базуулсан ч намын дүрэмдээ өөрчлөлт оруулж түүнийг генсекээр нь үлдээх сонголтыг хийсэн ч байж болно. 
Гэхдээ цаг минутаар өөрчлөгддөг тус намын шийдвэр магадгүй энэ удаад ч эрс өөрчлөгдөхийг үгүйсгэхгүй. Тиймээс ирэх 11 дүгээр сард болох МАН-ын бага хурлаар шинэ генсекээ томилох уу, намын дүрэмдээ өөрчлөлт оруулах уу гэдгийг харах л үлдлээ.