Хотын дарга, сайд хоёроо зорчих эрхээ хязгаарлуулмааргүй байна

Хичээлийн шинэ жил эхлэхтэй холбоотойгоор түгжрэлийг сааруулахаар автомашины дугаарын тэгш, сондгойгоор долоо хоног зорчуулах шийдвэрийг нийслэлээс гаргасан. 

Харин энэ удаа дээрх шийдвэрээ үргэлжлүүлэх эсэхийг энэ сарын 7-нд болох НИТХ-аар оруулахаар бэлтгэсэн байна. Хотын дарга Д.Сумъяабазар бол тэгш, сондгойгоор зорчуулах сонирхолтой байгаа аж. Гэхдээ НИТХ-ын төлөөлөгчид эцсийн шийдвэрийг гаргана.
Олон нийтийн хувьд энэ нь шийдвэр нь түгжрэлийг шийдэх зөв шийдэл биш гэж үзэж байгаа юм. Хэрвээ энэ шийдлийг удаан үргэлжлүүлбэл хоёр автомашинтай өрхүүд дугаарыг нь тэгш, сондгой болгох зэргээр хувийн хэрэгцээндээ тохируулан хөдөлгөөнд оролцоно. Боломжтой зарим нь дахиад автомашин авах, нэн шаардлагатай гэж үзсэн нь лизингээр унаатай болохоор зүтгэнэ. 
Товчхондоо нэмэгдэхүүний байрыг солиход нийлбэрийн чанар өөрчлөгдөхгүй. 
Хэрвээ дээрх шийдвэрээ үргэлжлүүлбэл автомашинтай иргэдийн зорчих эрхэд хэт халдахаас гадна, авто зам ашигласны төлбөр төлөгчдийг хууран мэхлэх замаар өндөр татвар авсан болж таарна. Энэ мэтчилэн сөрөг үр дагавар ихтэй. 
Уг нь Засгийн газартаа хүртэл нийслэлийн түгжрэлийн асуудлыг шийдвэрлэх сайдтай болсон. Энэ нь асуудлыг яаравчлан, гэхдээ иргэдэд ээлтэй байдлаар зохицуулах боломжийг нээх ёстой гэсэн үг байлтай. 
Тийм байтал өнөө, маргаашаа аргацаахын тулд шууд иргэдийнхээ эрхийг зөрчих нь ардчилсан улсад арай л хэтийдсэн шийдвэр болох гээд байна.