​ Мөрөөдөгч хөрсөнд буухгүй байсаар ажлаа өгөх нь

Зам тээврийн хөгжлийн сайд Л.Халтар хөөрхий мөрөөдөх дуртай нэгэн гэдгээ алхам бүртээ баталдаг болж. Уг нь тэр хөрсөндөө бууж хэрэгжүүлэх ёстой ажлаа л хийх учиртай. Харамсалтай нь ам нээх бүртээ мөрөөдөл, хий итгэл үнэмшил ярьсаар өдийг хүргэлээ.
Тэр өмнө нь “Дарханы замаар ингээдээ алхах өдөр ирнэ” гэж тавлаж байсан бол тун удалгүй “Дарханы замтай ямар үйлийн үрээр учирчхав” гээд гайхшаа барчихсан тууж явсан.
Харин энэ удаа Хөвсгөл нуурт усан онгоц аялж эхэлсний 112, Монголд усан замын тээврийн салбар үүсэж хөгжсөний түүхт 70 жилийн ойн үеэр дахиад л олон нийтийг гайхшируулав.
Тэр “Хөвсгөл аймгийг аялал жуулчлалын бүс болгон хөгжүүлнэ. Үүнд усан замын тээвэр, тэр дундаа зорчигч тээвэр чухал. Цаашдаа Монголын экспортын ачааг өөрийн орны далбаатай хөлөг онгоцоор тээвэрлэх нь бидний мөрөөдөл.” гэж хэлж орхив.
Уг нь төр, засгийн ажил, төсөл, арга хэмжээ мөрөөдлөөр жигүүрлэсэн нэг сайдын санаагаар бус бодлого, баримт бичгийн хүрээнд явагддаг баймаарсан. Харамсалтай нь, Л.Халтар бол мөрөөдлөө биелүүлэхээр сайд болсон нэгэн гэлтэй л байлаа.