​Дээд шүүхийн шийдвэрээр банкууд баярлах уу, иргэд баярлах уу

Анхан шатны болон давж заалдах шатны шүүхээс банк “зээл судалсны 1%-ийн шимтгэл” авах нь хууль бус гэх дүгнэлт гарсан. Үүнтэй холбогдуулан иргэд Дээд шүүхийн шийдвэрийг хуруу даран хүлээж, нийгэмд томоохон хүлээлт үүсээд байна. Мэдээж Дээд шүүхийн шийдвэр өмнөх шатны шүүхтэй адил гарвал банкууд иргэдийн мөнгийг буцааж төлөх асуудал үүснэ. Дан ганц банкууд бус ББСБ-ууд ч үүнд хамаарах юм. Учир нь Банк болон ББСБ-ууд нэг хуулиар зохицуулагддаг. Энэ хуульд зээл судалсны 1%-ийн шимтгэл авна гэж заагаагүй. Иймээс л асуудал эгзэгтэй үедээ иржээ. Харин сайны хажуугаар саар гэгчээр “Санхүүгийн салбарын гол хөл болох банкны салбараа татаж унагах гэлээ” гэсэн шүүмжлэл ажиглагдах болов. Банкны салбар манай улсад хөгжиж байгаа юу гэвэл тийм. Гагцхүү хуулиас дээгүүр аашилж, шимтгэл хураамж нэрээр мөнгө завшин, түүнийгээ эргэлдүүлж оршин тогтнодог эрүүл бус банкны систем хөгжиж болохгүй. Энэ л хамгийн чухал. Үнэн хэрэгтээ банк болон ББСБ-ууд иргэдээс авсан 1%-ийн зээлийн шимтгэлээ аль хэдийн өсгөж үржүүлж, ашиг олчихсон юм чинь буцааж өгөх хуулийн шаардлагыг дагах нь зүйн хэрэг. Гэхдээ Дээд шүүхийн шийдвэр хэрхэхээс их зүйл хамаарах болчхоод байна. Иргэдийн зээл авах гэсэн санхүүгийн зайлгүй шаардлагад нь дөрөөлөн “Өгсөн юм чинь авна” гэдэг зарчмаар 1%-ийг нь булаагаад авчихдаг тогтолцоог халж, шүүх хараат бус шийдвэр гаргаасай хэмээн ард иргэд хүлээж сууна.