Г.Занданшатар: Үнийн өсөлт ирэх намар хамгийн өндөр түвшинд хүрэх магадлалтайг ОУ-ын шинжээчид анхааруулж байна

УИХ-ын чуулганы өнөөдрийн хуралдаан эхэллээ. Чуулганы хуралдааны эхэнд УИХ-ын дарга Г.Занданшатар "УИХ-ын 34 дүгээр тогтоолын дагуу Үндсэн хуулийн нэмэлт өөрчлөлтийг тандан судлах ажлыг орон даяар өнгөрсөн долоо хоногт хийлээ. Иргэдийн зүгээс  бараа бүтээгдэхүүний үнэ өсөж, худалдан авах чадварыг доройтуулж, амьжиргаанд сөргөөр нөлөөлж байна, ядуурал тэгш бус байдал даамжрах нөхцлийг бүрдүүлж байна гэж зүйлийг л ярьж байна. Энэ нь гадаад хүчин зүйлээс шалтгаалсан боловч, үүнийг анзаарахгүй орхих эрх УИХ-д байхгүй. Дэлхий нийтийг хамарсан цар тахал, түүнээс бий болсон тээвэр логистикийн нийлүүлэлтийн тасалдал, геополитикийн хурцадмал байдал нь 1990 оноос байгаагүй хүнд цохилтыг өгч байгаа нь тодорхой байна. 

Инфляцийн түвшин 2021 оны тавдугаар сарын дүнгээр 6.2 хувь байсан бол өнөөдөр улсын хэмжээнд 15.1 хувь. Улаанбаатар хотод 16.2 хувьд хүрлээ. Төв банкны УИХ-аас баталсан зорилтоос давж гарсан байна. Инфляци 2.5 дахин өсөхөд бараа бүтээгдэхүүн, шатахууны үнийн өсөлт гол нөлөөлж байна. Үүн дотор хүмүүсийн амжиргааны гол бүтээгдэхүүн болох хүнсний бүтээгдэхүүний үнийн өсөлт 18 хувьд хүрсэн байна. Бүс нутагтаа хамгийн өндөр түвшинд хүрлээ. 

Тодруулбал, 

Төмс 970-2500  төгрөг болж2,5 дахин 

Лууван 2000-4700  төгрөг болж 2,3 дахин 

Ургамлын тос 4300-9500  төгрөг болж 2,5 дахин

Байцаа 3000-5200  төгрөг болж 1,7 дахин 

Элсэн чихэр 2700-3750 төгрөг болсон

Атар талх 1280-1700 төгрөг болсон

1 литр сүү /Сүү ХК/ 2830-3600 төгрөг болсон 

Цагаан будаа 3650-4600 төгрөг болсон

Энэ үнэн дээр тээвэр шатахууны зардал нэмэгдэж, орон нутгийн иргэдэд хүрч байна. Иймээс өнгөрсөн дөрөвдүгээр сард батласан Үнийн өсөлтийг хязгаарлах хуулийнхаа хэрэгжилтийг дүгнэн үзэж, шаардлагатай зарим арга хэмжээг судлах шаардлагатай байна. Үнийн өсөлт ирэх намар хамгийн өндөр түвшинд хүрэх магадлалтайг ОУ-ын шинжээчид анхааруулж байна. Импортоос хамааралтай манай эдийн засаг ирэх 9, 10 сар, оны эцэс гэхэд инфляцийн, нэн ялангуяа хүнсний бүтээгдэхүүний өсөлтөд ард иргэд нэрвэгдэж болзошгүй байна. Иймээс ажлын хэсэг байгуулж, үнийн өсөлтийг хязгаарлах хууль, иргэдийн орлогыг нэмэгдүүлэх боломжийг судлах хэрэгтэй байна" хэмээлээ.