ОХУ-ын Элчин сайдын яамнаас цаг үеийн асуудлаар мэдээлэл хийлээ

ОХУ-ын Элчин сайдын яамнаас өнгөрсөн долоо хоногт мэдээлэл хийлээ. Уг мэдээллийг бүрэн эхээр нь хүргэе.

 -Мэдээллийн эхэнд ОХУ, Украины цэргийн тусгай ажиллагаатай холбоотой мэдээллийг барууны хэвлэлүүдээс иш татах биш ОХУ-ын эх сурвалжуудаас авч олон нийтэд хүргэх шаардлагатай гэж үзэж байгаагаа мэдэгдлээ. 

Үргэлжлүүлэн ОХУ, Украины цэргийн тусгай ажиллагаатай холбоотойгоор барууны улс орнуудаас тогтоосон хориг арга хэмжээнд анхаарал хандуулж байгаагаа тодотголоо. Энэхүү хориг нь дэлхий даяар хүнсний аюулгүй байдал болон Африк, Америкт ноцтой хохирол учруулж байна гэлээ. ОХУ-аас бараа бүтээгдэхүүн худалдан авах, импортлон оруулж ирэх, тээвэрлэхэд шууд хориг тогтоосон. Ингэснээр Европын холбооны далайн боомтод ОХУ-ын хөлөг нэвтрэхэд хязгаарлалт тогтоосон, ОХУ-тай хийж буй хамтын ажиллагааг зогсоох шийдвэрийг барууны ачаа тээвэрлэлтийн компаниуд шахаж, тулгаж байгаа нь худалдааны хэвийн үйл ажиллагааг хязгаарлаж байна. Улмаар ачаа тээврийн үнийг нэмэгдүүлж, логистикийн маршрутыг уртасгаж байгааг онцоллоо.

Мөн хүнс, бордоо, эрчим хүч бусад нэн чухал бүтээгдэхүүнийг нийлүүлэлтийн тогтвортой байдлыг хангах үүднээс ОХУ гэрээгээр хүлээсэн бүх үүргээ биелүүлж, одоо мөрдөгдөж байгаа хэлэлцээрүүдийг гадаад орнуудын түншүүдтэй хамтран гүйцэд боловсруулах ажил хийхэд нээлттэй. ОХУ-ын зүгээс тогтоосон эдийн засгийн хязгаарлалтын зарим хариу арга хэмжээ, тэр дундаа ХАА-н бүтээгдэхүүн, түүхий эд экспортлохтой холбоотой хориг арга хэмжээ нь түр зуурын шинж чанартай гэдгийг онцоллоо. 

Үүний дараа цэргийн ажиллагааны талаар мэдээлэл өгсөн юм. 

Мөн мэдээллийн үеэр ОХУ-ын Элчин сайдын яамны гадаа тус улсын эсрэг чиглэсэн жагсаалын тухай байр сууриа илэрхийллээ. 

Энэ талаар "Монголын ард түмний үзэл бодлоо илэрхийлэх эрхийг хэн ч үгүйсгэх ёсгүй. Гэхдээ жагсаал хийх холбогдох зөвшөөрлөө аваагүй бол Элчин сайдын яамны гадаа жагсаал хийхийг хориглосон байдаг. Энэ жагсаалыг энх тайвны замаар, шуугиан дэгдээхгүйгээр зохион байгуулбал хэн ч эсэргүүцэхгүй. Элчин сайдын яамны гадаа жагссан жагсагчид ОХУ-ын зарим мужуудын далбааг барьж жагсах нь хууль зүйн хувьд зохисгүй явдал юм. Учир нь энэ үйлдэл ОХУ-н дотоод хэрэгт шууд оролцсоныг илэрхийлдэг" гэлээ. 

Үүний дараа ОХУ-аас БНХАУ руу Монголоор дамжуулан байгалийн хийн хоолой барих төслийн хэрэгжүүлэхтэй холбоотой өдөөн хатгалгын шинжтэй мэдээллүүд хэвлэлээр гарч байгааг онцлон холбогдох тайлбарыг өглөө. 

Энэ талаар "Хэвлэлүүдээр ОХУ-аас БНХАУ руу Монголоор дамжуулан байгалийн хийн хоолой барих төслийг хэрэгжүүлэхтэй чиглэсэн ташаа мэдээллүүд гарч байгааг бид харж байна. Хий дамжуулах хоолой барихыг эсэргүүцэж байгаа нэг шалтгаан нь шугамын дагуу зурвас газрыг тусгаарлан Монгол Улсын нутаг дэвсгэрийг хувааж, түүгээр чөлөөтэй зорчих боломжгүй болно гэсэн байна. Хий дамжуулах хоолой газар доогуур баригдана гэдгийг дахин баталгаажуулан хэлье. Хийн хоолойг ашиглахад газрыг аж ахуйн эргэлтээс хасахгүй бөгөөд ХАА, малын бэлчээрийн зориулалтаар чөлөөтэй ашиглах боломжтой. Ямар ч хашилт хийхгүй. Одоогоор зураг төслийн ажил хийгдэж байна. Зураг төслийн явцад Монголын компаниудыг татан оролцуулсан экологийн нарийвчилсан судалгаа хийж, байгаль орчинд нөлөөлөх байдлын үнэлгээ гаргаж, сөрөг нөлөөллөөс урьдчилан сэргийлэх бүхий л арга хэмжээг авах болно. Сөрөг нөлөө үзүүлэхгүй гэдгийг ТЭЗҮ боловсруулах явцад хийгдсэн урьдчилсан судалгаа харуулсан. Хийн хоолой дамжуулах төсөл нь ОХУ, БНХАУ, Монгол Улсын стратегийн түншлэлийг хөгжүүлэхэд чухал ач холбогдолтой,  их хэмжээний хөрөнгө татахад Монгол Улсын эдийн засагт түлхэц болно. Барилгын ажлын явцад Монголын барилга үйлчилгээний компаниудын нөөцийг татах, дотоодын барилгын материалыг татахаар төлөвлөж байна. Төсөл хэрэгжүүлэгч нь Монголын аливаа ААН-ийн нэгэн адил татвар, газрын төлбөрийн түрээсээ төлж, өндөр мэргэшсэн ажлын байрыг бий болгоно. Уг төслийг хэрэгжүүлснээр Монгол Улс байгалийн хийг экологийн цэвэр түлш болгон ашиглах боломжтой. Мөн байгалийн хийн хэрэглээтэй холбоотой бизнесийн шинэ боломжуудыг нээнэ" гэлээ.