Хачигт халдвараар 10-14 насны хүүхдүүд ихэвчлэн өвчилж байна

Дэлхийн дахинд хачгаар дамждаг нийт 28 төрлийн халдвар байдгаас манай орны хувьд хүн амын дунд хачигт риккетсиоз, хачигт боррелиоз, хачигт энцефалит зэрэг хачгийн гурван төрлийн халдвар бүртгэгддэг.

Хаврын 4-5 дугаар сард хачигны ид идэвхжлийн үе бөгөөд энэ талаар ХӨСҮТ Зоонозын өвчин судлалын тасаг "Өнөөдрийн байдлаар хачигт халдвараар 40 тохиолдол бүртгэгдэж, зургаа нь эмнэлэгт хэвтэн эмчлүүлж байна. Насны хувьд 10-14 насны хүүхдүүд ихэвчлэн өвчилж байна. Хүндэрсэн тохиолдолд одоогоор байхгүй байна. Хачигт боррелиоз, хачигт энцефалит хувьд эрт оношлоод эмчилгээ хийлгэчихвэл эрсдэл багатай. Харин хачигт риккетсиозын хувьд үлдэц ихтэй өвөрмөц эмчилгээ шаарддаг өвчин учраас анхаарал болгоомжтой байх хэрэгтэй. Хачиг биед чинь орсон л бол шууд татаж авч болохгүй, ойр байх эмч, эмнэлгийн байгууллагад хандах шаардлагатай" гэв.

ХАЧИГТ ХАЛДВАРААС СЭРГИЙЛЭХИЙН ТУЛД ИРГЭДЭД ДАРААХ ЗӨВЛӨМЖИЙГ ӨГЧ БАЙНА. ҮҮНД:

• 1. Онцын шаардлагагүй бол хачгийн идэвхижлийн үед хөдөө, орон нутаг, ойд зорчихгүй байх, хачгаас сэрэмжлүүлсэн санамж, самбар, пайз, тэмдэг тавих.
• 2. Хачгийн идэвхжлийн үед өдөр бүр биедээ ялангуяа толгойн үсэнд хачиг орсон эсэхийг шалгах
• 3. Хөдөө явахдаа хачгийг илрүүлэхийн тулд тод өнгийн хувцас өмсч, хачиг илэрсэн тохиолдолд авч хаях
• 4. Хөдөө явахдаа урт ханцуйтай хувцас, урт түрийтэй гутал, зузаан өмд өмсч, хачиг нэвтрүүлэхгүйн тулд өмдний шуумгийг гутлын түрүүний дотуур хийх
• 5. Хачиг үргээгч бодисыг хувцасны ханцуй, өмд уруу цацах
• 6. Хэрвээ эмнэлэгт хандах боломжгүй газарт хачигт хазуулсан бол хазсан хачиган дээр 76%-ийн спиртээр 2-3 удаа арчилт хийж, 1-2 минут хүлээгээд хавчаараар хушууны хэсгээс чимхэж, 45 градусын налуу өнцгөөр зөөлөн ганхуулан татаж авна. Хачиг хазсан хэсэгт хөвөнд шингээсэн 1%-ийн повидон иодын уусмал (тамедины уусмал) эсвэл 76%-ийн спиртийн уусмалаар цэвэр боолт хийнэ. Урьдчилан сэргийлэх зорилгоор эмчилгээ хийлгэх шаардлагатай байдаг тул эмнэлэгт яаралтай хандах шаардлагатай.
• 7. Нутагшмал тархалттай газруудад ажиллаж, амьдарч байгаа иргэд хачигт энцефалит өвчнөөс сэргийлэх вакцин тариулах
• 8. Ямаа, үхрийн түүхий сүү уухгүй байх, эдгээр амьтдын махыг сайтар болгож хэрэглэх,гөрөөс, ямааны цус уухгүй байх.