Х.Нямбаатар сайд цагдаагийн алба хаагчдын эхнэрүүдтэй уулзана

Цагдаагийн алба хаагчдын эхнэрүүүдийн группээс Х.Нямбаатар сайдад хандан постер гаргаж сошиалд тавьсан нь олон хүний анхаарлыг татаад байна. 

Тэд "Эрхэм Х.Нямбаатар сайд аа, цагдаагийн цалинг нэмж, илүү цагийг олгодог болгож өгнө үү. Жишээ, цагаан сарын баярын өдрүүдэд ажиллуулсан хирнээ цалинг бүх нийтийн амалт гээд бодож өгдөггүй хөдөлмөрийн мөлжлөгийг халж өгнө үү" гэжээ. 

Харин энэ нь  ХЗДХ-ийн сайд Х.Нямбаатарт хүрч тэрбээр энэ талаар нийгмийн сүлжээндээ “Цагдаагийн алба хаагчдын хөдөлмөрийн нөхцөл хүнд, цалин хангамж тааруу нь үнэн. Цагдаагийн алба хаагчдын эхнэрүүдийн группийнхний хэлж буйг ч ойлгож, хүлээн авч байна. Төрийн албан хаагчдын цалин хангамж, ялангуяа цагдаагийн албан хаагчдын цалин хөлс, ажиллах орчин, хангамжтай холбоотой эргэж харах асуудал цөөнгүй бий.

Цагдаагийн байгууллагад хийх шинэчлэлийн ажлуудын нэг хэсэг нь энэ асуудал байх ёстой. Группийн гишүүдийн төлөөллийг хүлээн авч уулзъя, нөхцөл байдлыг сонсъё. Олон нийттэй харилцах мэргэжилтнүүддээ уулзалт товлохыг захисан байгаа” хэмээн бичжээ.