Г.Дөлгөөн: Чингис хаан банк төлбөрийн чадваргүй болсон нь үнэн, Үндэсний хөрөнгө оруулалтын банкинд төрийн 76 тэрбум төгрөг үлдсэн

УИХ-ын Эдийн засгийн байнгын хорооны хурал үргэлжилж байна. 

Хуралдааны үеэр УИХ-ын гишүүн Ч.Хүрэлбаатар  "Монголбанк Үндэсний хөрөнгө оруулалтын банканд 14 тэрбум төгрөгийн зээл олгосон нь үнэн үү? Эрүүл мэдийн даатгалын сангийн 14 тэрбум төгрөг тус банканд гацсан байсан. Энэ мөнгийг Төв банк төлбөрийн чадваргүй болсон банканд зээлүүлсэн нь үнэн үү? Ийм алхам хийх нь зөв үү" гэсэн асуултад хариулт авахыг хүслээ. 

Уг асуултад Монголбанкны тэргүүн Дэд ерөнхийлөгч Г.Дөлгөөн  “Чингис хаан банк төлбөрийн чадваргүй болсон нь үнэн. Иймд бид хэд хэдэн удаагийн шаардлага хүргүүлсэн. Харин Үндэсний хөрөнгө оруулалтын банк 14 сая ам.долларын хөрөнгө оруулалтыг гаднаас татсан. Иймд 14 тэрбум төгрөгийн зээлийг оны өмнө тусламж хэлбэрээр олгосон. Бид  түр журам батлаад 2 жил болсон. Энэ журмын дагуу хэд хэдэн банканд зээллэг олгосон. Банкны тухай хуулийн дагуу банкуудын нэрийг дурдах боломжгүй.Үндэсний хөрөнгө оруулатын банканд төрийн 76 тэрбум төгрөг үлдсэн” гэсэн хариулт өглөө.