Байлдагчаа зодож амийг нь хөнөөсөн дэслэгч Г-д 14 жилийн хорих ял оноолоо

Өнгөрсөн гуравдугаар сарын 28-ны өдөр Хан-Уул дүүргийн XII  хорооны нутаг дэвсгэр Биокомбинатад байрлах Зэвсэгт хүчний 326 дугаар ангийн байлдагч Б салаан даргын үүрэг гүйцэтгэгч, дэслэгч Д.Гялбуужамцид зодуулж, амиа алдсан харамсалтай хэрэг гарсан. Тэгвэл байлдагчаа зодож амийг нь хөнөөсөн дэслэгч Г-д 14 жилийн хорих ял оноох шийдвэрийг шүүхээр гаргасан байна. 

Тодруулбал, Хан-Уул дүүргийн Прокурорын газраас Зэвсэгт хүчний дугаар ангийн салааны захирагч, дэслэгч Д.Гялбуужамцад холбогдуулан Эрүүгийн хуулийн тусгай ангийн 10.1 дүгээр зүйлийн 1 дэх хэсэгт зааснаар “Хүнийг алах”, 28.3 дугаар зүйлийн 1 дэх хэсэгт зааснаар “дарга захирагч нь захирагдагчдаа хүч хэрэглэх” гэмт хэрэгт яллах дүгнэлт үйлдэж ирүүлсэн эрүүгийн хэргийг Хан-Уул дүүргийн Эрүүгийн хэргийн анхан шатны шүүх 2021 оны 12 дугаар сарын 14-ний өдөр хянан хэлэлцлээ.

 Шүүхээс шүүгдэгчид Эрүүгийн хуулийн тусгай ангийн 28.3-1-д зааснаар ял сонсгож ирүүлсэнийг Өршөөлийн хуульд зааснаар хэрэгсэхгүй болгож, мөн хуулийн 10.1-1-д зааснаар “Хүнийг алах” гэмт хэрэгт гэм буруутайд тооцож, 14 жилийн хугацаагаар хорих ял шийтгэж, уг хорих ялыг нээлттэй хорих байгууллагад эдлүүлэхээр шийдвэрлэв.

Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхийн тамгын газар