Талийгаач М.Алтан-Оргилын ээж: Хүү нь ээждээ хайртай шүү гэж хэлээд утсаа тасалсан, шөнөжин залгасан ч утсаа аваагүй

Зуурдаар амь насаа алдсан “Street dreams” шоуны ялагч, “Orice” нэрээр олонд танигдсан реппер М.Алтан-Оргилын найзууд өнөөдөр мэдээлэл хийлээ. 

Өнгөрсөн оны долдугаар сард “Street dreams” шоуны ялагч реппер Orice буюу М.Алтан-Оргил таван давхраас учир битүүлгээр унасны улмаас нас барсан харамсалтай хэрэг  гарсан юм. 

Талийгаач М.Алтан-Оргилын найз  "“Street dreams” шоуны ялагч, “Orice” нэрээр олонд танигдсан реппер М.Алтан-Оргил өнгөрсөн оны долдугаар сарын 23-24-нд шилжих шөнө таван давхраас унаж бэртээд ГССҮТ-д хэвтэн эмчлүүлж байгаад, 27-нд өвчнөө дийлэхгүй нас барсан. Талийгаач бид 2 амьдрал, уран бүтээлийн найзууд байсан. Хэнд ч хар буруу санадаггүй, нөхөрсөг, нийтэч, манлайлагч, тусч залуу байсан. Хэзээ ч ямар ч нөхцөлд таван давхраас даавуу унжуулаад буухыг оролдох хүн биш. 

1.  Анх хэрэг гардаг өдөр цагдаа нар ГССҮТ-д ирж, М.Алтан-Оргилын өөрийн гараар бичсэн, бусдад зодуулсан, утсаа дээрэмдүүлсэн гэх өргөдлийг гэр бүл найзуудад нь харуулж бичгийн хэв таниулсан. Талийгаачийн бичгийн хэв мөн байсан ч удалгүй тийм өргөдөл гомдол байхгүй гэсэн. Товчхондоо тэр өргөдөл ор сураггүй алга болсон. 
2.  Таван давхраас унжуулж байгаад буухыг оролдсон гэсэн тэр даавуунд шүүх шинжилгээний дүгнэлтээр сэмрэлт суналт, хүн зүүгдээд буусан байх шинж тэмдэг байхгүй гэж гарсан. 
3.  Найдваргүй болсон гээд гэр бүл найз нөхдийг нь оруулж байхад хүзүүн дээр нь боймлуулсан байж болзошгүй хөхрөлт няцралт, ил болон далд шарх маш их байсан. 

Хэрэгт хамааруулж татсан нэг хүн байгаач тэр хүнийг Зөрчлийн хуулиар 100 мянган төгрөгөөр торгоод явуулсан байна. Хуулийн дагуу хэрэг мөрдөлт удаашралтай байгаад гомдолтой байна. Үнэн мөнийг тогтоох гэсэн сэтгэл зүтгэл байхгүй. Талийгаач амь насаа алдаад 430 хонож байна. Бид гомдолтой байна. Энэ бол гадны нөлөөтэй хэрэг. Хүний амь нас үнэгүйдээд байна " гэлээ.  

Талийгаач М.Алтан-Оргилын ээж "Хүү нь ээждээ хайртай шүү гэж хэлээд утсаа тасалсан, шөнөжин залгасан ч утсаа аваагүй. Орой 23 цагаас хойш утсаа аваагүй утас нь дуудаж байгаад холбогдохгүй болчихсон. Өглөө 06 цагт цагдаагаас дуудсан. Очиход миний хүү гэмтлийн эмнэлэг дээр ухаангүй байсан. Миний хүү зодуулсан нь үнэн. Зодуулчихаад 102 дуудаад өөрөө мэдүүлгээ өгчихсөн. "Миний хүзүү толгой өвдөөд хөдөлж чадахгүй байна. Утсыг маань дэрэмдчихсэн" гээд мэдүүлэг бичиж өгөөд гарын үсэг зурсан. Өргөдөл бичсэн. Өргөдөл нь алга болчихсон. Миний хүүг зодсон нь үнэн. Дээрэмдсэн нь үнэн. Дээрэмдсэн хүнийхээ тагтнаас унасан нь үнэн. Ийм гурван үнэн байхад яагаад үгүйсгээд байна вэ? Ерөнхий прокурорт долоо хоногийн өмнө хүсэлт гаргасан тэр хариуг л хүлээж байна" гэлээ.