СЭРЭМЖЛҮҮЛЭГ: Өөрийгөө ОСМО компанийн зуучлагч гэж иргэдийг залилж байна

Нэгэн иргэн нийгмийн сүлжээндээ байр түрээслэхээр ОСМО компанийн ажилтан гэх хүнд залилуулсан талаар бичсэн байсан. 

Энэ талаараа EGUUR.mn сайтад "Эгч нь 8-р сараас хойш л байр хайсан болохоор яг хайж байсан байршилд байр түрээслэнэ гэсэн болохоор хэт түргэджээ. Охидоо байранд оруулаад, сайн ажиллавал болно байх гэж бодсон. Есдүгээр сарын 3-ны өдөр би “2019 онд ашиглалтад орсон, цэвэрхэн нэг өрөө байр түрээслүүлнэ” гэх зарын дагуу н.Эрдэнэбулган гэх хүүтэй холбогдсон. Ингээд очиж үзнэ гэж тохироод утсаа тасалсан. Гэтэл төд удалгүй над руу эргэж залгаад “Эгч ээ над руу олон хүн залгаад байна. Та хэрвээ байрандаа найдвартай оръё гэвэл байрныхаа түрээсийн 80 хувийг төлөх хэрэгтэй байна” гэж хэлсэн.

Над руу хэд хэд залгаад хэлсэн учир би дөрвөн сарын байрны түрээс, нэмэлт барьцааны төлбөртэй хамт шилжүүлнэ гэхээр нь урьдчилгаа хоёр сая төгрөг шилжүүлээд, үлдсэнийг байраа үзсэний дараа төлбөрөө хийхээр тохирсон. Ингээд надад “ажил орой 22: 00 цагт тарна, тэгээд уулзаж байраа үзүүлье” гэж хэлсэн. Товлосон цагтаа залгахад дуудлага нь шууд тасраад байхаар нь завгүй байна гэж бодтол миний дугаарыг блок хийсэн байсан. Фэйсбүүк нь ч мөн нээгдэхгүй байсан. Надад өөрийгөө “Осмо”-ийн зуучлагч гэж хэлсэн юм. Тэгэхээр нь бүр итгэчихсэн" гэсэн ярилцлага өгсөн юм. 

Түүний хувьд энэ асуудлаа нийгмийн сүлжээнд бичсэнтэй холбогдуулан хэргийг Хан-Уул дүүргийн цагдаагийн хэлтсээс шалгаж эхэлсэн байна.