“Хуанжу Гэг” киногоороо танил болсон Жао Вэй Хятадаас дүрвэж, Францад очжээ

1990-ээд оны сүүлчээр “Хуанжу Гэг” буюу “Сувдан гүнж” нэртэй телевизийн олон ангит кино гарч эхэлсэн нь үзэгчдийг байлдан дагуулж чадсан. Энэхүү киноны гол дүрд БНХАУ-ын алдарт жүжигчин Жао Вэй тоглосон. Түүний хувьд  Хятадад богино хугацаанд амжилтад хүрч, Азийн хамгийн их ашиг орлоготой жүжигчний нэгээр шалгарч байсан юм. 

Тэгвэл саяхнаас түүний мэдээлэл БНХАУ-ын цахим орчноос бүрэн арчигдсан байна. Түүний бичлэгүүд бүгд устгагдаж бүр тоглосон кинонуудынх нь тухай мэдээлэлд хүртэл нэр нь гарч ирдэггүй болжээ. 

Энэхүү хачирхалтай үйл явц нь таван жилийн өмнө Жаогийн компаний бүтээж байсан нэгэн кинонд Тайван жүжигчин тоглуулах болсноос үүдэлтэй гэнэ. Үүнийг тус улсын Коммунист намынхан эх оронч бус үйлдэл хэмээн зарлаж, удалгүй Жаогийн компанийг татвараас зайлсхийсэн гэж буруутган олон саяын өрөнд унагааж, бизнесүүдийг хязгаарлаж эхэлсэн байна.  

Хятадын мэдээллийн сайтууд дээр Жао хувийн онгоцоороо эх орноосоо дүрвэж, Францын Улсад нөхөр Хуан Юлонгийн хамт усан үзмийн талбай бүхий эдлэндээ нуугдаж байгаа  гэх мэдээллийг нийтлэж байна.